అద్దంకి మున్సిపల్ ఎన్నికలు ప్రశాంతం.

అద్దంకిలో మున్సిపల్ ఎన్నికలు ఆదివారం ప్రశాంతంగా ముగిశాయి. మున్సిపల్ పరిధిలోని మొత్తం 32 వార్డులకు గాను 49 పోలింగ్ బూత్లను అధికారులు ఏర్పాటు చేశారు. ఓటర్లకు ఎటువంటి ఇబ్బందులు కలగకుండా అన్ని సౌకర్యాలను అధికారులు సమకూర్చారు. ఉదయం 7 గంటలకు ప్రారంభమైన ఎన్నికల ప్రక్రియ సాయంత్రం ఐదు గంటలకు ముగిసింది. ఎలాంటి అవాంఛనీయ సంఘటనలు చోటు చేసుకోకుండా డీఎస్పీ బాలమురళీకృష్ణ నేతృత్వంలో భారీ బందోబస్తు ఏర్పాటు చేశారు. జిల్లా ఎస్పీ హర్షవర్ధన్ రాజు ఉదయం 11 గంటల సమయంలో పోలింగ్ స్టేషన్లను తనిఖీ చేశారు. బందోబస్తు పరిశీలించారు. మొత్తం 31,895 మంది ఓటర్లకు గాను 9 గంటల సమయానికి 10.33 శాతం,11 గంటల సమయానికి 30.28 శాతం, మధ్యాహ్నం ఒంటిగంటకు 56.70 శాతం, మూడు గంటలకు 68 శాతం పోలింగ్ కాగా సాయంత్రం ఐదు గంటలకు పోలింగ్ ముగిసే సమయానికి 25,491 మంది ఓటర్లు తమ ఓటు హక్కును వినియోగించుకోగా 79.92 శాతంగా నమోదయింది.