-తెల్ల బంగారంపై అర్నబ్ తుఫాన్ పంజా… --వల్లాపురం రైతులకు కన్నీళ్లు మిగిలాయి! వైరా రూరల్ (సూర్య న్యూస్):-

వైరా రూరల్ (సూర్య న్యూస్):- అక్టోబర్ 28  ;అర్నబ్ తుఫాన్ ప్రభావం పత్తి రైతుల పాలిట శాపంగా మారింది. ఆరుగాలం కష్టపడి సాగు చేసిన పంట చేతికొచ్చే సమయంలో ప్రకృతి ప్రకోపం రైతుల ఆశలపై నీళ్లు చల్లింది. వైరా మండలం వల్లాపురం గ్రామంలో తుఫాన్ ప్రభావంతో కురిసిన వర్షం, వీచిన బలమైన గాలులకు సుమారు 200 ఎకరాల్లో పత్తి పంట తీవ్రంగా దెబ్బతింది. కోతకు సిద్ధంగా ఉన్న పత్తి చేలు నేలకొరిగి, వర్షపు నీటికి తడిసిపోవడంతో రైతులకు తీవ్ర నష్టం వాటిల్లింది.
ఇప్పటికే కూలీల కొరతతో పత్తి కోతలు ఆలస్యమవుతున్నాయి. పంట పూర్తిగా చేతికొచ్చినా, కూలీలు అందుబాటులో లేకపోవడంతో రైతులు పత్తి తీయలేకపోయారు. ఈ క్రమంలో తుఫాన్ విరుచుకుపడటంతో ఇప్పటివరకు ఒక్కసారి కూడా పత్తి తీయని చేలలో పంట పూర్తిగా దెబ్బతింది. పంటను కాపాడుకునే అవకాశం లేకపోవడంతో రైతులు నిస్సహాయ స్థితిలోకి వెళ్లిపోయారు.
విత్తనాలు, ఎరువులు, పురుగుమందులు, సాగు ఖర్చుల కోసం వేలాది రూపాయలు పెట్టుబడి పెట్టిన రైతులకు పంట నష్టం తీరని దెబ్బగా మారింది. పంట చేతికొస్తే అప్పులు తీర్చుకోవచ్చని, కుటుంబ అవసరాలు తీర్చుకోవచ్చని ఆశించిన రైతులకు తుఫాన్ తీవ్ర నిరాశను మిగిల్చింది. కళ్లముందే పంట నేలపాలవడంతో రైతులు కన్నీటిపర్యంతమవుతున్నారు. పెట్టుబడులు ఎలా రాబట్టుకోవాలి? అప్పులు ఎలా తీర్చాలి? అనే ఆందోళన వారిని వెంటాడుతోంది.
వల్లాపురం గ్రామంలో దెబ్బతిన్న పత్తి పంటను సంబంధిత వ్యవసాయ, రెవెన్యూ అధికారులు తక్షణమే పరిశీలించాలని రైతులు డిమాండ్ చేస్తున్నారు. పంట నష్టాన్ని క్షేత్రస్థాయిలో అంచనా వేసి, ప్రభుత్వానికి నివేదిక సమర్పించాలని కోరుతున్నారు. ప్రకృతి వైపరీత్యంతో తీవ్రంగా నష్టపోయిన రైతులకు ప్రభుత్వం నష్టపరిహారం అందించి ఆదుకోవాలని విజ్ఞప్తి చేస్తున్నారు. పంట నష్టంపై అధికారులు తక్షణమే స్పందించి, బాధిత రైతులకు న్యాయం చేయాలని వల్లాపురం రైతులు కోరుతున్నారు.