పేద విద్యార్థి వైద్య విద్యకు స్పీకర్‌ గడ్డం ప్రసాద్‌కుమార్‌ మరో రూ.లక్ష సాయం
మర్పల్లి, మేజర్‌ న్యూస్‌ : పేదరికం ప్రతిభకు అడ్డుకాకూడదని, ఆర్థిక ఇబ్బందులతో ఏ విద్యార్థి ఉన్నత చదువులకు దూరం కాకూడదనే స్ఫూర్తితో తెలంగాణ శాసనసభ స్పీకర్‌ గడ్డం ప్రసాద్‌కుమార్‌ పేద విద్యార్థి వైద్య విద్యకు అండగా నిలిచారు. వికారాబాద్‌ జిల్లా మర్పల్లి మండలం పట్లూర్‌ గ్రామానికి చెందిన గణపురం అనిల్‌కు ఎంబీబీఎస్‌ చదువు కొనసాగించేందుకు మరో రూ.లక్ష ఆర్థిక సాయం అందజేశారు. అనిల్‌ తల్లిదండ్రులు మొగులయ్య దంపతులు దినసరి కూలీలుగా పనిచేస్తూ కుటుంబాన్ని పోషిస్తున్నారు. నిరుపేద కుటుంబంలో జన్మించిన అనిల్‌ కష్టపడి చదివి 2024లో గాంధీ ఆస్పత్రిలో ఎంబీబీఎస్‌ వైద్య విద్య అభ్యసించే అవకాశం దక్కించుకున్నాడు. అయితే కుటుంబ ఆర్థిక పరిస్థితులు వైద్య విద్య కొనసాగించేందుకు ఇబ్బందిగా మారాయి. ఈ విషయాన్ని గుర్తించిన స్పీకర్‌ గడ్డం ప్రసాద్‌కుమార్‌ గత ఏడాది రూ.లక్ష ఆర్థిక సాయం అందించి విద్యార్థిని ప్రోత్సహించారు. తాజాగా మరో రూ.లక్ష అందజేసి తన మానవతా దృక్పథాన్ని చాటుకున్నారు. ఆర్థిక ఇబ్బందులతో అనిల్‌ చదువు మధ్యలో ఆగిపోకుండా స్పీకర్‌ అందిస్తున్న సహాయం ఎంతో తోడ్పాటునివ్వనుంది. వైద్యుడిగా ఎదిగి సమాజానికి సేవ చేయాలనే అనిల్‌ లక్ష్యానికి ఈ ఆర్థిక చేయూత భరోసానిస్తోంది. ప్రతిభావంతులైన పేద విద్యార్థులను ప్రోత్సహించడం సమాజ అభివృద్ధికి దోహదపడుతుందని పలువురు హర్షం వ్యక్తం చేశారు. ఈ కార్యక్రమంలో ఎస్‌ఐఆర్‌ వికారాబాద్‌ నియోజకవర్గ కన్వీనర్‌ చామల రఘుపతి రెడ్డి, కాంగ్రెస్‌ పార్టీ నాయకుడు సురేష్‌ తదితరులు పాల్గొన్నారు.
