telangana
నిరుద్యోగ యువత విజయానికి ప్రభుత్వం అండగా ఉంటుంది: స్పీకర్‌ గడ్డం ప్రసాద్‌కుమార్‌
తాండూరు, మేజర్ న్యూస్: నిరుద్యోగ యువత పోటీ పరీక్షల్లో విజయం సాధించి ఉన్నత స్థాయికి ఎదిగేందుకు ప్రభుత్వం అండగా ఉంటుందని తెలంగాణ శాసనసభ స్పీకర్‌ గడ్డం ప్రసాద్‌కుమార్‌ అన్నారు. తాండూరు పట్టణంలోని విలియమూన్‌ స్కూల్‌లో బీఎంఆర్‌ ఫౌండేషన్‌ ఆధ్వర్యంలో బుధవారం నిర్వహించిన కార్యక్రమంలో పోటీ పరీక్షలకు సిద్ధమవుతున్న సుమారు 250 మంది అభ్యర్థులకు ఉచిత స్టడీ మెటీరియల్‌ను పంపిణీ చేశారు. ఈ సందర్భంగా స్పీకర్‌ మాట్లాడుతూ నిరుద్యోగ యువతకు పోటీ పరీక్షల సన్నద్ధతలో తోడ్పాటునందించేందుకు తాండూరు ఎమ్మెల్యే బుయ్యని మనోహర్‌రెడ్డి చేస్తున్న కృషి అభినందనీయమన్నారు. రాష్ట్ర ప్రభుత్వం వివిధ సంక్షేమ పథకాల అమలుతో పాటు యువతకు ఉపాధి అవకాశాలు కల్పించేందుకు కృషి చేస్తోందని తెలిపారు. గతంలో 2018లో పరిగిలోనూ బీఎంఆర్‌ ఫౌండేషన్‌ ఆధ్వర్యంలో నిరుద్యోగ యువత కోసం ఉచిత కోచింగ్‌ కార్యక్రమం నిర్వహించిన విషయాన్ని గుర్తుచేశారు. ఎమ్మెల్యే బుయ్యని మనోహర్‌రెడ్డి మాట్లాడుతూ పోటీ పరీక్షలకు సిద్ధమయ్యే అభ్యర్థులకు ఉచిత కోచింగ్‌, స్టడీ మెటీరియల్‌ అందించేందుకు చర్యలు చేపట్టామని తెలిపారు. సమయం ఎంతో విలువైనదని, దానిని వృథా చేయకుండా కష్టపడి చదివి లక్ష్యాన్ని చేరుకోవాలని యువతకు సూచించారు. ఈ కార్యక్రమంలో జిల్లా కలెక్టర్‌ దీపక్‌ తివారి, జిల్లా ఎస్పీ స్నేహ మెహ్రా, కాంగ్రెస్‌ పార్టీ జిల్లా అధ్యక్షుడు దారాసింగ్‌, తాండూరు మున్సిపల్‌ చైర్‌పర్సన్‌ నీరజ బాల్‌రెడ్డి తదితరులు పాల్గొన్నారు.
