రైతులకు మరింత చేరువ కానున్న సహకార సేవలు... - తుర్కలమద్దికుంటలో నూతన పీఏసీఎస్ ఏర్పాటు.. - ఘనంగా సంబరాలు
సూర్య - పెద్దపల్లి రూరల్ : పెద్దపల్లి మండలం తుర్కలమద్దికుంటలో నూతన ప్రాథమిక వ్యవసాయ సహకార సంఘం (పీఏసీఎస్) ఏర్పాటు కావడంతో గ్రామ ప్రజలు, రైతులు సంబరాలు జరుపుకున్నారు. తుర్కలమద్దికుంట చౌరస్తా వద్ద బాణాసంచా కాల్చి, స్వీట్లు పంపిణీ చేస్తూ ఆనందం వ్యక్తం చేశారు.
నూతన పీఏసీఎస్ పరిధిలో గోపాయ్యపల్లి, పాలితం, కసులపల్లి, తుర్కలమద్దికుంట, నిట్టూరు, నిమ్మన్పల్లి, పెద్దకల్వల, పెద్దబొంకూర్, దస్తగిరిపల్లి, కొత్తపల్లి గ్రామాలను చేర్చారు. ఈ సంఘం ఏర్పాటుతో ఆయా గ్రామాల రైతులకు సహకార సేవలు మరింత చేరువ కానున్నాయని, వ్యవసాయాభివృద్ధికి, రైతుల సంక్షేమానికి దోహదపడుతుందని రైతులు హర్షం వ్యక్తం చేశారు.
ఈ సందర్భంగా ముఖ్యమంత్రి రేవంత్రెడ్డి, వ్యవసాయ శాఖ మంత్రి తుమ్మల నాగేశ్వరరావుకు కృతజ్ఞతలు తెలిపారు. పీఏసీఎస్ ఏర్పాటుకు ప్రత్యేక కృషి చేసిన ప్రభుత్వ విప్, పెద్దపల్లి ఎమ్మెల్యే చింతకుంట విజయరమణరావుకు పెద్దపల్లి పీఏసీఎస్ చైర్మన్ ముత్యాల నరేష్ ముదిరాజ్ ప్రత్యేక ధన్యవాదాలు తెలియజేశారు. కార్యక్రమంలో సర్పంచ్ గోగు రాజయ్య, ఉపసర్పంచ్ ముత్యాల తిరుపతి, ఏఎంసీ డైరెక్టర్ రాజేశం గౌడ్, పీఏసీఎస్ డైరెక్టర్ ప్రసన్న రాజబాబు, మాజీ సర్పంచ్ వెంకటి, మాజీ ఎంపీటీసీ తిరుపతి, వార్డు సభ్యులు, గ్రామ పెద్దలు, రైతులు, కాంగ్రెస్ నాయకులు, కార్యకర్తలు, యువకులు పెద్ద సంఖ్యలో పాల్గొన్నారు.