ప్రత్యామ్నాయ పంటల సాగుపై రైతులకు అవగాహన
నెల్లూరు రూరల్, మేజర్ న్యూస్ : నెల్లూరు రూరల్ మండలంలోని సౌత్ మోపూరు గ్రామంలో గురువారం రైతులకు ప్రత్యామ్నాయ పంటల సాగు, ఎరువుల విక్రయాల్లో ప్రవేశపెట్టిన నూతన విధానంపై వ్యవసాయ శాఖ ఆధ్వర్యంలో అవగాహన కార్యక్రమం నిర్వహించారు.ఈ కార్యక్రమానికి ముఖ్యఅతిథిగా జిల్లా వ్యవసాయ అధికారి పి. సత్యవాణి మరియు మండల సహాయ వ్యవసాయ సంచాలకులు బి. శ్రీదేవి, వ్యవసాయ అధికారి నాగమోహన్ హాజరై రైతులకు పలు సూచనలు చేశారు.ఈ సందర్భంగా జిల్లా వ్యవసాయ అధికారి పి. సత్యవాణి మాట్లాడుతూ.. ప్రస్తుతం నెలకొన్న వర్షాభావ పరిస్థితులను దృష్టిలో ఉంచుకుని రైతులు తొందరపడి వరి నారుమడులు పోయవద్దని సూచించారు.తగిన వర్షపాతం లేకుండా వరి సాగు చేపడితే రైతులు ఆర్థికంగా నష్టపోయే అవకాశం ఉందన్నారు. నీటి లభ్యత, వాతావరణ పరిస్థితులను బట్టి ప్రత్యామ్నాయ పంటల సాగుకు ప్రాధాన్యత ఇవ్వాలని తెలిపారు. ముఖ్యంగా మినుము, జొన్న, మొక్కజొన్న వంటి పంటల సాగుపై రైతులు దృష్టి సారించాలని సూచించారు.అనంతరం ఎరువుల విక్రయాల్లో ప్రవేశపెట్టిన నూతన విధానం ఎఫ్ఎఫ్ఎస్ (ఫ్రేమ్వర్క్ ఆఫ్ ఫర్టిలైజర్స్ సేల్) గురించి వివరించారు. ఈ విధానం ద్వారా ఎరువుల కొనుగోలు కోసం దుకాణాల వద్ద గంటల తరబడి క్యూలైన్లలో వేచి ఉండాల్సిన అవసరం లేదని, ఇంటి వద్ద నుంచే ఎరువులను బుక్ చేసుకునే సౌకర్యం అందుబాటులో ఉంటుందని తెలిపారు. ఈ విధానం వల్ల రైతులకు సమయం ఆదా కావడంతో పాటు ఎరువుల కొనుగోలు ప్రక్రియ సులభతరం అవుతుందని వివరించారు.రైతులందరూ వ్యవసాయ శాఖ సూచనలను పాటిస్తూ పరిస్థితులకు అనుగుణంగా ప్రత్యామ్నాయ పంటలను సాగు చేయాలని, ఎరువుల విక్రయాల నూతన విధానం ఎఫ్ఎఫ్ఎస్ను సద్వినియోగం చేసుకోవాలని అధికారులు కోరారు.ఈ కార్యక్రమంలో గ్రామ రైతులు, వ్యవసాయ శాఖ సిబ్బంది పాల్గొన్నారు.