నాగులచవితికి ఆధ్యాత్మిక శోభ.. సుబ్రహ్మణ్య స్వామి ఆలయంలో భక్తుల సందడి *పుట్టకు, జంట నాగులకు భక్తిశ్రద్ధలతో పాలాభిషేకాలు*

నాగులచవితికి ఆధ్యాత్మిక శోభ.. సుబ్రహ్మణ్య స్వామి ఆలయంలో భక్తుల సందడి

*పుట్టకు, జంట నాగులకు భక్తిశ్రద్ధలతో పాలాభిషేకాలు*

మిర్యాలగూడ అర్బన్, మేజర్ న్యూస్:

నాగులచవితి పర్వదినాన్ని పురస్కరించుకుని మిర్యాలగూడ పట్టణంలోని శ్రీనివాస నగర్‌లో కొలువుదీరిన శ్రీ వల్లి దేవసేన సమేత సుబ్రహ్మణ్యేశ్వర స్వామి దేవస్థానం భక్తుల రాకతో ఆధ్యాత్మిక శోభను సంతరించుకుంది. శుక్రవారం తెల్లవారుజాము నుంచే భక్తులు పెద్ద సంఖ్యలో ఆలయానికి చేరుకుని ప్రత్యేక పూజలు నిర్వహించారు. ఆలయ ప్రాంగణంలోని నాగుపుట్టకు, జంట నాగులకు పాలు పోసి భక్తిశ్రద్ధలతో పాలాభిషేకాలు చేశారు.

ఈ ఆలయ ప్రత్యేకత ఏమిటంటే వల్లి, దేవసేన సమేతంగా సుబ్రహ్మణ్యేశ్వర స్వామివారు కొలువుదీరి భక్తులకు దర్శనమివ్వడం. హిందూ సంప్రదాయంలో సుబ్రహ్మణ్య స్వామిని నాగదోష నివారణ, కుజదోష నివారణ, సంతాన ప్రాప్తి కోసం ఆరాధించడం విశేష విశ్వాసంగా కొనసాగుతోంది. ఈ నేపథ్యంలో నాగులచవితి రోజున స్వామివారిని దర్శించుకుని పూజలు నిర్వహించేందుకు భక్తులు ఆసక్తి చూపారు.

నాగారాధనతో పాటు సుబ్రహ్మణ్య స్వామి ఆరాధనకు విశేష ప్రాధాన్యత ఉన్న ఈ క్షేత్రంలో భక్తులు కుటుంబ సమేతంగా పాల్గొని స్వామివారికి ప్రత్యేక పూజలు సమర్పించారు. ఆలయ ప్రాంగణమంతా భక్తుల పూజలు, మంత్రోచ్ఛారణలతో ఆధ్యాత్మిక వాతావరణం నెలకొంది.

ఈ సందర్భంగా ఆలయ పూజారి తంగిరాల విశ్వనాథ శర్మ ఆధ్వర్యంలో పూజా కార్యక్రమాలు నిర్వహించారు. నాగులచవితి వేడుకలతో శ్రీనివాస నగర్‌లోని సుబ్రహ్మణ్యేశ్వర స్వామి దేవస్థానం ప్రత్యేక ఆధ్యాత్మిక ఆకర్షణగా నిలిచింది.