ప్రభుత్వ ఉన్నత పాఠశాలను సందర్శించిన జిల్లా విద్యాశాఖ అధికారి అయూబ్

అనంతపురం విద్య మేజర్ న్యూస్:-జిల్లా విద్యాశాఖ అధికారి అయూబ్ హుస్సేన్ శుక్రవారం  ఉరవకొండలోని ప్రభుత్వ ఉన్నత పాఠశాలను సందర్శించారు. ఈ సందర్భంగా పాఠశాలలో విద్యార్థులకు అందిస్తున్న విద్యాబోధన, పాఠశాల నిర్వహణ, విద్యా ప్రమాణాలు, మౌలిక సదుపాయాలను పరిశీలించారు. ఉపాధ్యాయులతో మాట్లాడి విద్యార్థుల అభ్యసన సామర్థ్యం, విద్యా ప్రగతి, బోధనా పద్ధతుల గురించి వివరాలు తెలుసుకున్నారు.
విద్యార్థులకు నాణ్యమైన విద్య అందించడంలో ఉపాధ్యాయుల పాత్ర ఎంతో కీలకమని పేర్కొంటూ, ప్రతి విద్యార్థిపై ప్రత్యేక శ్రద్ధ చూపాలని సూచించారు. విద్యార్థుల్లో క్రమశిక్షణ, చదువుపై ఆసక్తి, ఉన్నత లక్ష్యాలను సాధించాలనే పట్టుదలను పెంపొందించాలని తెలిపారు. పాఠశాలలో విద్యా ప్రమాణాలను మరింత మెరుగుపరిచేందుకు ఉపాధ్యాయులంతా సమష్టిగా కృషి చేయాలని సూచించారు. కార్యక్రమంలో పాఠశాల ప్రధానోపాధ్యాయులు, ఉపాధ్యాయులు, ఇతర సిబ్బంది పాల్గొన్నారు.

 మల్లికార్జున నేటి దినపత్రిక సూర్య స్టాఫ్ రిపోర్టర్