విశాఖ CII భాగస్వామ్య సదస్సులో పాల్గొన్న బాపట్ల ఎంపీ శ్రీ తెన్నేటి కృష్ణ ప్రసాద్

విశాఖపట్నం, మేజర్‌న్యూస్‌ :
విశాఖపట్నంలో ప్రతిష్టాత్మకంగా జరుగుతున్న 31వ CII భాగస్వామ్య సదస్సు (CII Partnership Summit 2026) మొదటి రోజు (నవంబర్ 12) కార్యక్రమంలో లోక్ సభ ప్యానల్ స్పీకర్ మరియు బాపట్ల పార్లమెంట్ సభ్యులు శ్రీ తెన్నేటి కృష్ణ ప్రసాద్ గారు (IPS Retd.) పాల్గొన్నారు. ఈ సందర్భంగా ఆయన దేశ విదేశాల నుండి విచ్చేసిన ప్రముఖ పారిశ్రామికవేత్తలు, పెట్టుబడిదారులు మరియు వివిధ రంగాల ప్రతినిధులతో సదస్సు ప్రాంగణంలో ప్రత్యేకంగా సమావేశమయ్యారు. ముఖ్యమంత్రి శ్రీ నారా చంద్రబాబు నాయుడు గారి సమర్థవంతమైన నాయకత్వంలో ఆంధ్రప్రదేశ్ రాష్ట్రం పారిశ్రామిక రంగంలో వేగంగా ముందుకు దూసుకెళ్తోంది. బాపట్ల పార్లమెంట్ నియోజకవర్గం పరిధిలో వ్యవసాయ ఆధారిత పరిశ్రమలు, ఆక్వా రసాయనాలు, టూరిజం, కోస్టల్ కారిడార్ మరియు అనుబంధ రంగాలలో విస్తృతమైన పెట్టుబడి అవకాశాలు అందుబాటులో ఉన్నాయి అని ఎంపీ శ్రీ తెన్నేటి కృష్ణ ప్రసాద్ గారు అన్నారు. రాష్ట్రంలో మరియు బాపట్ల పార్లమెంట్ పరిధిలో పరిశ్రమలను స్థాపించడానికి ముందుకు రావాలని పారిశ్రామికవేత్తలను ఆయన ఆహ్వానించారు. ప్రజాప్రతినిధిగా పెట్టుబడిదారులకు అవసరమైన అన్ని రకాల పూర్తి సహకారాన్ని అందిస్తామని ఆయన హామీ ఇచ్చారు.