జీహెచ్‌ఎంసీ అధికారులకు సీఎం రేవంత్ రెడ్డి అభినందనలు
హైదరాబాద్ :కేంద్ర గృహనిర్మాణం, పట్టణాభివృద్ధి మంత్రిత్వ శాఖ నిర్వహించిన ‘స్వచ్ఛ సర్వేక్షణ్ 2025-26’లో గ్రేటర్ హైదరాబాద్ మున్సిపల్ కార్పొరేషన్ (GHMC) తెలంగాణ రాష్ట్రంలోనే అత్యంత పరిశుభ్రమైన నగరంగా తొలిస్థానంలో నిలిచి జాతీయ పురస్కారాన్ని దక్కించుకుంది. ఢిల్లీలో జరిగిన ప్రత్యేక కార్యక్రమంలో భారత రాష్ట్రపతి శ్రీమతి ద్రౌపది ముర్ము చేతుల మీదుగా రాష్ట్ర మంత్రి పొన్నం ప్రభాకర్, జీహెచ్‌ఎంసీ కమిషనర్ ఆర్వీ కర్ణన్, హెచ్‌ఎండీఏ కమిషనర్ సర్ఫరాజ్ అహ్మద్ ఈ అవార్డును అందుకున్నారు. ఈ సందర్భంగా నగర పారిశుద్ధ్య కార్మికులు, అధికారులు మరియు సిబ్బంది సమష్టి కృషిని అభినందిస్తూ ముఖ్యమంత్రి శ్రీ ఎ. రేవంత్ రెడ్డి ప్రత్యేక శుభాకాంక్షలు తెలిపారు.
నగరంలో పారిశుద్ధ్య నిర్వహణ, చెత్త ఉచిత సేకరణ, ఘన వ్యర్థాల ప్రాసెసింగ్, మురుగునీటి శుద్ధి మరియు ప్రజల భాగస్వామ్యం ఆధారంగా జీహెచ్‌ఎంసీకి ఈ గుర్తింపు లభించింది. హైదరాబాద్‌ను గ్రీన్ సిటీగా, నెట్‌జీరో సిటీగా మార్చే లక్ష్యంలో ఈ పురస్కారం ఒక కీలక మైలురాయి అని, ఇది పర్యావరణహిత పద్ధతులను మరింత బలోపేతం చేసేందుకు ప్రోత్సాహాన్నిస్తుందని సీఎం పేర్కొన్నారు.
