గిరిజన యువతకు నైపుణ్య శిక్షణతో ఉపాధి అవకాశాలు
కుల్కచర్ల, మేజర్ న్యూస్:గిరిజన యువతీ యువకులకు మెరుగైన ఉపాధి అవకాశాలు కల్పించాలనే లక్ష్యంతో ట్రైకార్ ఆధ్వర్యంలో నిర్వహిస్తున్న నైపుణ్యాభివృద్ధి శిక్షణా కార్యక్రమాలను సద్వినియోగం చేసుకోవాలని జిల్లా గిరిజన అభివృద్ధి శాఖ అధికారులు హరికృష్ణ, వినోద్, రాథోడ్ రాజేందర్ నాయక్ అన్నారు. మండల పరిధిలో చెరువు ముందలి తండా (ఏ) బండవెల్కిచర్ల, రాంపూర్, టేకుల తండా, నేరెళ్లకుంట తండా, ఎత్తుకాల్వ తండాల్లో అవగాహన సదస్సులు నిర్వహించారు. ఈ సందర్భంగా వారు మాట్లాడుతూ.. గిరిజన యువతీ యువకులకు వివిధ నైపుణ్యాభివృద్ధి కోర్సుల్లో ఉచిత శిక్షణతో పాటు వసతి, భోజన సదుపాయాలు కల్పిస్తున్నట్లు తెలిపారు. శిక్షణ పూర్తిచేసుకున్న వారికి ఉపాధి అవకాశాలు కల్పించేలా చర్యలు తీసుకుంటున్నామని, యువత ఈ అవకాశాన్ని సద్వినియోగం చేసుకోవాలని కోరారు. ఉచిత శిక్షణ వసతి కోసం 8464006666 నంబర్ ను సంప్రదించాలన్నారు.