గౌడవల్లి పెద్ద చెరువు శిఖం భూమిలో అక్రమ ప్లాట్లు.. రూ.10 కోట్ల ప్రభుత్వ భూమిపై వివాదం

మేడ్చల్, మేజర్ న్యూస్: ప్రభుత్వ భూములకు రక్షణ కరువవుతోందా..? చెరువులు, కుంటలను పరిరక్షించాల్సిన అధికారుల పర్యవేక్షణలోనే ఆక్రమణలు చోటుచేసుకుంటున్నాయనే ఆరోపణలు మేడ్చల్–మల్కాజిగిరి జిల్లాలో చర్చనీయాంశంగా మారాయి. గుండ్లపోచంపల్లి డివిజన్ పరిధిలోని గౌడవల్లి గ్రామ పెద్ద చెరువుకు సంబంధించిన సర్వే నంబర్ 237లో సుమారు ఎకరం మేర ఉన్న చెరువు శిఖం భూమిని ఆక్రమించి ప్లాట్లుగా విభజించి అమాయక ప్రజలకు విక్రయిస్తున్నారనే ఆరోపణలు వెల్లువెత్తుతున్నాయి. ఈ భూమి ప్రస్తుత మార్కెట్ విలువ సుమారు రూ.10 కోట్ల వరకు ఉంటుందని స్థానికులు అంచనా వేస్తున్నారు. ప్రభుత్వానికి చెందిన చెరువు భూమిని ప్రైవేటు భూమిగా చూపించి విక్రయించే ప్రయత్నాలు జరుగుతున్నాయని గ్రామస్తులు ఆందోళన వ్యక్తం చేస్తున్నారు. ఈ వ్యవహారంలో అధికార పార్టీకి చెందిన ప్రజాప్రతినిధి ప్రమేయం ఉందంటూ గ్రామస్తులు ఫిర్యాదు చేసినట్లు సమాచారం. చెరువులు, నాలాలు, ప్రభుత్వ భూముల ఆక్రమణలను అరికట్టేందుకు ప్రభుత్వం హైడ్రాను ఏర్పాటు చేసి చర్యలు చేపడుతున్న నేపథ్యంలో, అధికార పార్టీకి చెందిన ప్రజాప్రతినిధిపై ఇలాంటి ఆరోపణలు రావడం ప్రాధాన్యత సంతరించుకుంది. చెరువు భూములను పరిరక్షించాల్సిన బాధ్యత కలిగిన వారిపైనే ఆరోపణలు రావడం స్థానికంగా చర్చకు దారితీస్తోంది. ఈ నేపథ్యంలో రెవెన్యూ, ఇరిగేషన్, మున్సిపల్ అధికారులు తక్షణమే స్పందించి సర్వే నంబర్ 237లోని భూమిపై సమగ్ర విచారణ చేపట్టాలని గ్రామస్తులు కోరుతున్నారు. ప్రభుత్వ రికార్డులు, ఎఫ్‌టీఎల్‌, బఫర్‌జోన్‌ పరిధులను పరిశీలించి భూమి స్వరూపాన్ని నిర్ధారించాలని డిమాండ్ చేస్తున్నారు. ఆక్రమణలు నిజమని తేలితే బాధ్యులపై కఠిన చర్యలు తీసుకోవడంతో పాటు, అక్రమ విక్రయాలను అడ్డుకుని చెరువు భూమిని కాపాడాలని కోరుతున్నారు. కోట్లాది రూపాయల విలువైన ప్రభుత్వ భూమి వ్యవహారంపై అధికారులు ఎప్పుడు స్పందిస్తారోనని గ్రామస్తులు ఎదురుచూస్తున్నారు.