ప్రజలకు అందుబాటులో ఉంటూ సేవలందించాలి

13 మంది టీడీపీ ఎంపీటీసీలకు ఆర్. చంద్రశేఖర్ అభినందనలు

గుడిపల్లి మేజర్ న్యూస్:

గుడిపల్లి మండలంలోని 13 ఎంపీటీసీ స్థానాలను కైవసం చేసుకున్న తెలుగుదేశం పార్టీ అభ్యర్థులకు ఏఎంసీ మాజీ చైర్మన్, కుప్పం నియోజకవర్గ సమన్వయ కమిటీ కన్వీనర్ ఆర్. చంద్రశేఖర్ అభినందనలు తెలిపారు.

ఈ సందర్భంగా ఆయన మాట్లాడుతూ.. ఎన్నికల్లో విజయం సాధించిన ఎంపీటీసీలు ప్రజలు తమపై ఉంచిన నమ్మకాన్ని నిలబెట్టుకోవాలని సూచించారు. రాజకీయమంటే కేవలం పదవులు, హోదాలు, ఆకర్షణలు కాదని, ప్రజలకు నిస్వార్థంగా సేవ చేసే బాధ్యత అని పేర్కొన్నారు. ప్రతి ఒక్కరూ ప్రజలకు అందుబాటులో ఉంటూ వారి సమస్యల పరిష్కారానికి కృషి చేయాలని పిలుపునిచ్చారు.

ముఖ్యమంత్రి నారా చంద్రబాబు నాయుడు ఆశయాలకు అనుగుణంగా గ్రామాల అభివృద్ధికి సమష్టిగా కృషి చేస్తూ ప్రజల మన్ననలు పొందాలని 13 మంది ఎంపీటీసీలకు ఆయన సూచించారు.

సూర్య రిపోర్టర్: లెనిన్ బాబు గుడిపల్లి మండలం