జొన్నవాడ కామాక్షితాయి ఆలయంలో హుండీ లెక్కింపు

నెల్లూరు కల్చరల్, మేజర్ న్యూస్  :   ప్రసిద్ధ పుణ్యక్షేత్రమైన జొన్నవాడ శ్రీ మల్లికార్జున స్వామి సమేత కామాక్షితాయి దేవస్థానంలో శనివారం భక్తుల కానుకల హుండీల లెక్కింపు కార్యక్రమాన్ని నిర్వహించారు. దేవదాయ ధర్మదాయ శాఖ అధికారులు, దేవస్థాన చైర్మన్, ధర్మకర్తల మండలి సభ్యులు, సహాయ కమిషనర్, కార్యనిర్వహణాధికారి  సమక్షంలో ఆలయ ప్రాంగణంలో హుండీలను తెరిచి భక్తులు సమర్పించిన కానుకలను లెక్కించారు. గత 95 రోజులకు గాను (తేదీ 04.08.2026 నుండి 06.11.2026 వరకు) శ్రీవార్ల ప్రధాన ఆలయ హుండీల ద్వారా రూ. 53,68,476 నగదు ఆదాయం లభించింది. అలాగే అన్నప్రసాద హుండీ ద్వారా రూ. 3,00,487 ఆదాయం సమకూరింది. దీంతో ఆలయానికి మొత్తం రూ.56,68,963 నగదు రూపంలో సమకూరినట్లు అధికారులు వెల్లడించారు. నగదుతో పాటు భక్తులు స్వామి, అమ్మవార్లకు పెద్ద ఎత్తున విలువైన కానుకలను సమర్పించారు. ఇందులో 71 గ్రాముల 800 మిల్లీ గ్రాముల బంగారం, 230 గ్రాముల వెండి వస్తువులు లభ్యమయ్యాయి. వీటితో పాటు విదేశీ కరెన్సీ సైతం భారీగా వచ్చింది; 11 యూఎస్ డాలర్లు, 160 థాయ్ బాట్, 100 సింగపూర్ డాలర్లు, 10 మలేసియా రింగిట్‌లను భక్తులు హుండీల్లో సమర్పించినట్లు అధికారులు తెలిపారు. ఈ కార్యక్రమంలో నెల్లూరు మూలాపేట శ్రీ వేణుగోపాల స్వామి దేవస్థానం సహాయ కమిషనర్, కార్యనిర్వహణ అధికారి జంజనం శ్రీనివాసరావు, జన్నవాడ దేవస్థాన సహాయ కమిషనర్, కార్యనిర్వహణ అధికారి అర్వభూమి వెంకట శ్రీనివాసులు రెడ్డి, చైర్మన్  అశోక్ రెడ్డి, ధర్మకర్తల మండలి సభ్యులు  ముంగర సుధాకర్ పాల్గొన్నారు. అలాగే బుచ్చిరెడ్డిపాలెం పోలీసు సిబ్బంది, స్థానిక ఏపీజీ బ్యాంక్ ప్రతినిధులు, ఆలయ సిబ్బంది, స్టేట్ బ్యాంక్ ఆఫ్ ఇండియా విశ్రాంత ఉద్యోగులు, శ్రీవార్ల సేవా సమితి సభ్యులు, భక్తులు పాల్గొన్నారు.