బీఆర్ఎస్ పాపానికే మేడిగడ్డ కూలింది

హైదరాబాద్: గత బీఆర్ఎస్ ప్రభుత్వ నిర్లక్ష్యం, చేసిన పాపాల వల్లే మేడిగడ్డ బ్యారేజీ కూలిపోయిందని రాష్ట్ర ముఖ్యమంత్రి శ్రీ ఎ. రేవంత్ రెడ్డి తీవ్ర స్థాయిలో ధ్వజమెత్తారు. మేడిగడ్డ దగ్గర బ్యారేజీ దెబ్బతినడం వల్లే కన్నెపల్లి వద్ద పంపులు పనిచేయని పరిస్థితి ఏర్పడిందని ఆయన స్పష్టం చేశారు. మేడిగడ్డలో కనీసం 16 టీఎంసీల నీటి మట్టం ఉంటేనే కన్నెపల్లి నుంచి నీటిని ఎత్తడానికి సాధ్యమవుతుందని, అంతేకాకుండా అన్నారం, సుందిళ్ల వద్ద గేట్లు దించకపోతే ఆ నీళ్లన్నీ మళ్లీ మేడిగడ్డకే చేరుకుంటాయని ఆయన వివరించారు. గత ప్రభుత్వ వైఫల్యం వల్ల కరువు సమయంలో రైతులకు సరిపడా నీళ్లు ఇవ్వలేకపోయామని ఆవేదన వ్యక్తం చేశారు. రాబోయే డిసెంబర్‌లో శాసనసభలో కాళేశ్వరం ప్రాజెక్టుపై సమగ్రమైన చర్చ జరుపుదామని, అలాగే ఎల్‌నినో ప్రభావంపై కూడా రెండు మూడ్రోజుల పాటు చర్చ చేపట్టాలని స్పీకర్‌ను కోరుతున్నట్లు ముఖ్యమంత్రి వెల్లడించారు.