ఎంపీటీసీలుగా తల్లీకూతుళ్ల ఘన విజయం

పాలకొండ, సూర్య : మండలంలో జరిగిన స్థానిక సంస్థల ఎన్నికల్లో తెలుగుదేశం పార్టీ తరఫున పోటీ చేసిన తల్లీకూతుళ్లు ఎంపీటీసీలుగా విజయం సాధించడం విశేషంగా నిలిచింది. డోలమడ ఎంపీటీసీ స్థానం నుంచి తెలుగుదేశం పార్టీ అభ్యర్థిగా పోటీ చేసిన కర్నేన యోగిత 871 ఓట్ల మెజారిటీతో ఘన విజయం సాధించారు. అలాగే వాటపాగు ఎంపీటీసీ స్థానం నుంచి టీడీపీ అభ్యర్థిగా బరిలో నిలిచిన కర్నేన పద్మిని ప్రియదర్శిని 641 ఓట్ల మెజారిటీతో గెలుపొందారు.  డోలమడ, వాటపాగు ఎంపీటీసీ పరిధిలో గెలిచిన యెగిత సీనియర్ తెలుగుదేశం పార్టీ నాయుకులు కర్నెన అప్పలనాయుడు భార్య, పద్మిని ప్రియదర్శిని అప్పలనాయుడు కుమార్తె. ఒక్కే కుటుంబానికి చెందిన తల్లీకూతుళ్లు ఇద్దరూ ఎంపీటీసీలుగా ఎన్నిక కావడంతో తెలుగుదేశం పార్టీ నాయకులు, కార్యకర్తలు, అభిమానులతో పాటు కూటమి పార్టీల నాయకులు, కార్యకర్తలు హర్షం వ్యక్తం చేశారు. కర్నేన యోగిత, కర్నేన పద్మిని ప్రియదర్శినిలకు పలువురు నాయకులు, కార్యకర్తలు అభినందనలు తెలియజేశారు.