ప్రజలందరికీ దీపావళి శుభాకాంక్షలు కోహెడ ఎస్సై అభిలాష్

కోహెడ ; దీపావళి పండుగను పురస్కరించుకుని కోహెడ ఎస్సై అభిలాష్ మండల ప్రజలందరికీ దీపావళి శుభాకాంక్షలు తెలియజేశారు. పండుగ వేళ ప్రజలు ఆనందోత్సాహాలతో వేడుకలు జరుపుకోవడంతో పాటు సైబర్ నేరాల పట్ల అప్రమత్తంగా ఉండాలని ప్రత్యేక అవగాహన సూచనలు జారీ చేశారు.దీపావళి పండుగను ఆసరాగా చేసుకుని సైబర్ నేరగాళ్లు అమాయక ప్రజలను మోసం చేసేందుకు వివిధ రకాల పద్ధతులను అనుసరిస్తున్నారని తెలిపారు. ఉచిత బహుమతులు, ఆకర్షణీయమైన ఆఫర్లు, క్యాష్‌బ్యాక్‌లు, నకిలీ లింకులు, అనుమానాస్పద మెసేజ్‌ల పట్ల అప్రమత్తంగా ఉండాలని సూచించారు.గుర్తుతెలియని వ్యక్తులు పంపే లింకులను క్లిక్ చేయవద్దని, ఓటీపీ, ఏటీఎం పిన్, బ్యాంకు వివరాలను ఎవరికీ వెల్లడించవద్దని హెచ్చరించారు. ఆన్‌లైన్ చెల్లింపులు చేసేటప్పుడు లావాదేవీల వివరాలను ఒకటికి రెండుసార్లు పరిశీలించాలని, సోషల్ మీడియాలో వచ్చే తప్పుడు సమాచారాన్ని నమ్మవద్దని పేర్కొన్నారు.సైబర్ మోసానికి గురైతే ఆలస్యం చేయకుండా వెంటనే 1930 సైబర్ క్రైమ్ హెల్ప్‌లైన్ నంబర్‌కు ఫిర్యాదు చేయాలని సూచించారు. ప్రజలందరూ పోలీసుల సూచనలు పాటిస్తూ సురక్షితంగా, ప్రశాంతంగా దీపావళి పండుగను జరుపుకోవాలని ఎస్సై అభిలాష్ కోరారు.