దీపావళి వేళ పేకాట ఆడితే కఠిన చర్యలు !!హద్నూర్ ఎస్ఐ దోమ సుజిత్!!
న్యాల్కల్;న్యాల్కల్ మండల కేంద్రంలో శనివారం హద్నూర్ సబ్ ఇన్‌స్పెక్టర్ సుజిత్ ఒక ప్రకటన విడుదల చేశారు. దీపావళి పండుగ సందర్భంగా న్యాల్కల్ మండల ప్రజలకు పేకాటకు దూరంగా ఉండాలని హెచ్చరించారు. ఎవరైనా పేకాట ఆడినా, నిర్వహించినా కేసులు నమోదు చేసి చట్టపరమైన చర్యలు తీసుకుంటామని స్పష్టం చేశారు. గ్రామాల్లో పేకాట నిర్వహించేందుకు స్థలం ఇచ్చిన యజమానులపై కూడా చర్యలు తీసుకుంటామని తెలిపారు. పేకాట వల్ల కుటుంబాలు ఆర్థికంగా నష్టపోవడమే కాకుండా, అప్పులపాలై కుటుంబాల్లో గొడవలు, ఇతర సమస్యలు తలెత్తే ప్రమాదం ఉందని పేర్కొన్నారు. కొందరు జూదం, మద్యానికి బానిసలై జీవితాలను నాశనం చేసుకుంటున్నారని ఆవేదన వ్యక్తం చేశారు. కావున ప్రజలు పేకాటకు దూరంగా ఉండి దీపావళి పండుగను ప్రశాంతంగా, ఆనందంగా జరుపుకోవాలని ఎస్ ఐ సుజిత్ తెలిపారు. గ్రామాల్లో ఎక్కడైనా పేకాట నిర్వహిస్తున్నట్లు తెలిస్తే వెంటనే పోలీసులకు సమాచారం అందించాలని కోరారు. సమాచారం ఇచ్చిన వారి వివరాలను పూర్తిగా గోప్యంగా ఉంచుతామని ఎస్ఐ సుజిత్ భరోసా ఇచ్చారు. అలాగే న్యాల్కల్ మండల ప్రజలకు దీపావళి శుభాకాంక్షలు తెలిపారు.
