11 న సీఎం చేతుల మీదుగా తమ్మిడికుంట చెరువు ప్రారంభోత్సవం..

                             ఏర్పాట్లను పరిశీలించిన ఎమ్మెల్యే గాంధీ,హైడ్రా కమిషనర్  ఏవీ రంగ‌నాథ్
మాదాపూర్‌,మేజర్ న్యూస్ : ఖానామెట్‌లోని తమ్మిడికుంట చెరువు పునరుద్ధరణ, సుందరీకరణ, అభివృద్ధి పనులను శనివారం ఎమ్మెల్యే గాంధీ ,హైడ్రా కమిషనర్ ఏ.వి. రంగనాథ్, కూకట్‌పల్లి జోనల్ కమిషనర్ మయాంక్ సింగ్, ఇతర అధికారులతో కలిసి పరిశీలించారు. ఈ నెల 11న ముఖ్యమంత్రి రేవంత్‌రెడ్డి చేతుల మీదుగా చెరువును ప్రారంభించనున్న నేపథ్యంలో పనులను త్వరితగతిన పూర్తి చేయాలని అధికారులను ఆదేశించారు.

ఈ సందర్భంగా వారు  మాట్లాడుతూ.. చెరువులోని ఆక్రమణలను తొలగించి, పూర్వ వైభవం తీసుకొచ్చేందుకు చర్యలు చేపట్టినట్లు తెలిపారు. మురుగునీరు చేరకుండా చెరువు చుట్టూ యుజిడి  పైప్‌లైన్, ఎస్టీపీ  నిర్మాణం చేపడుతున్నట్లు చెప్పారు. చెరువు కట్ట పటిష్టత, అలుగు మరమ్మతులు, ఫెన్సింగ్, వాకింగ్ ట్రాక్, సుందరీకరణ పనులు చేపడుతున్నట్లు వివరించారు. తామర పూల పెంపకంతో పాటు పచ్చదనాన్ని అభివృద్ధి చేసి ప్రజలకు ఆహ్లాదకరమైన వాతావరణం కల్పిస్తామన్నారు. పనుల్లో నాణ్యతా ప్రమాణాలు పాటించాలని, ఎక్కడా రాజీ పడకుండా నిర్ణీత గడువులోగా పూర్తి చేయాలని అధికారులకు సూచించారు. నియోజకవర్గంలోని అన్ని చెరువులను పరిరక్షించి సుందరీకరిస్తామని తెలిపారు.ఈ కార్యక్రమంలో హైడ్రా అధికారులు, స్థానిక నాయకులు, కార్యకర్తలు పాల్గొన్నారు.