ప్రధానితో ముఖాముఖికి యువతకు అవకాశం

విజయవాడ మేజర్ న్యూస్ : యువతలో ప్రజాస్వామ్య విలువలు, నాయకత్వ లక్షణాలు, సామాజిక బాధ్యత, జాతీయ సమగ్రతపై అవగాహన పెంపొందించడంతో పాటు దేశ భవిష్యత్తు నిర్మాణంలో వారి భాగస్వామ్యాన్ని ప్రోత్సహించే లక్ష్యంతో కేంద్ర యువజన వ్యవహారాలు, క్రీడల మంత్రిత్వ శాఖ ఆధ్వర్యంలో వికసిత్ భారత్ యంగ్ లీడర్స్ డైలాగ్–2027 (జాతీయ యువజనోత్సవం) నిర్వహించనున్నారు. ఇందులో భాగంగా వికసిత్ భారత్ యువ పార్లమెంట్ జిల్లా స్థాయి పోటీలను నవంబర్ 10న విజయవాడలో నిర్వహించనున్నట్లు అధికారులు తెలిపారు. విజయవాడలోని పీఎస్‌సీఎంఆర్ ఇంజినీరింగ్ అండ్ టెక్నాలజీ కళాశాల ప్రాంగణంలో ఉదయం 9 గంటల నుంచి ఈ పోటీలు జరగనున్నాయి. “ఒకే దేశం – ఒకే ఎన్నికలు” అనే అంశంపై యువత తమ ఆలోచనలు, అభిప్రాయాలు, విశ్లేషణాత్మక దృక్పథాన్ని సభా వేదికపై వ్యక్తపరిచే అవకాశం కల్పించనున్నారు. ఈ పోటీలకు సంబంధించిన గోడపత్రికలను ఎన్టీఆర్ జిల్లా కలెక్టర్ డాక్టర్ జి. లక్ష్మీశ జిల్లా అధికారులతో కలిసి శనివారం కలెక్టరేట్‌లో ఆవిష్కరించారు. ఈ సందర్భంగా యువత పెద్ద సంఖ్యలో పాల్గొని ప్రజాస్వామ్య చర్చల్లో భాగస్వాములు కావాలని కలెక్టర్ పిలుపునిచ్చారు. 18 నుంచి 25 సంవత్సరాల వయస్సు కలిగిన యువతీ యువకులు ఈ పోటీల్లో పాల్గొనడానికి అర్హులు. పోటీలకు హాజరయ్యేవారు తప్పనిసరిగా ఆధార్ కార్డు తీసుకురావాలి. నవంబర్ 10న ఉదయం 9 గంటలకల్లా పీఎస్‌సీఎంఆర్ కళాశాల ప్రాంగణానికి చేరుకోవాలి. జిల్లా స్థాయిలో ప్రతిభ కనబరిచిన విజేతలు రాష్ట్ర స్థాయి పోటీలకు ఎంపికవుతారు. రాష్ట్ర స్థాయిలో అర్హత సాధించిన వారికి జాతీయ స్థాయిలో జరిగే వికసిత్ భారత్ యంగ్ లీడర్స్ డైలాగ్‌లో పాల్గొనే అవకాశం లభిస్తుంది. ఈ సందర్భంగా ప్రధానమంత్రి నరేంద్ర మోదీని కలుసుకుని ముఖాముఖి సంభాషించే అరుదైన అవకాశం కూడా కల్పించనున్నారు. దేశ అభివృద్ధి, ప్రజాస్వామ్య వ్యవస్థ బలోపేతం, విధాన నిర్ణయాల్లో యువత భాగస్వామ్యం వంటి అంశాలపై తమ ప్రతిభను చాటుకునేందుకు ఈ పోటీలు వేదికగా నిలవనున్నాయి. ఎన్టీఆర్ జిల్లా పరిధిలోని అర్హులైన యువతీ యువకులు ఈ అవకాశాన్ని సద్వినియోగం చేసుకుని పెద్ద సంఖ్యలో పాల్గొనాలని మై భారత్–ఎన్టీఆర్ జిల్లా కార్యాలయం విజ్ఞప్తి చేసింది. మరిన్ని వివరాలకు 9640488813 నంబరులో సంప్రదించవచ్చు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.