వెండితెరపై మరోసారి విశ్వరూపం: సుదీక్ష ఎంటర్టైన్మెంట్ ద్వారా నవంబర్ 28న కమల్ హాసన్ 'దశావతారం' గ్రాండ్ రీ-రిలీజ్!
సూర్య ఎంటర్టైన్మెంట్ డెస్క్: భారతీయ చలనచిత్ర పరిశ్రమలో నటనకు సరికొత్త నిర్వచనం చెప్పిన విశ్వనటుడు, పద్మభూషణ్ కమల్ హాసన్ పుట్టినరోజును పురస్కరించుకుని ఆయన కెరీర్‌లోనే మైలురాయిగా నిలిచిన సంచలన చిత్రం 'దశావతారం' మరోసారి థియేటర్లలో సందడి చేయడానికి సిద్ధమవుతోంది. సుదీక్ష ఎంటర్టైన్మెంట్ సంస్థ ఈ అద్భుత దృశ్యకావ్యాన్ని నవంబర్ 28న అత్యంత భారీ స్థాయిలో గ్రాండ్ రీ-రిలీజ్ చేసేందుకు సన్నాహాలు చేస్తోంది. అప్పట్లో బాక్సాఫీస్ వద్ద సంచలన విజయాలను నమోదు చేయడమే కాకుండా, సాంకేతికత పరంగా ఒక అద్భుత సృష్టిగా నిలిచిన ఈ సినిమాను మళ్లీ వెండితెరపై చూసేందుకు అభిమానులు ఎంతగానో ఎదురుచూస్తున్నారు.
ప్రముఖ దర్శకుడు కె.ఎస్. రవికుమార్ తెరకెక్కించిన ఈ చిత్రంలో కమల్ హాసన్ ఏకంగా పది విభిన్న పాత్రల్లో నటించి ప్రపంచవ్యాప్తంగా ఉన్న సినీ ప్రేక్షకులను విస్మయానికి గురిచేశారు. ఒక్క నటుడు పది రకాల గెటప్‌లలో, వేర్వేరు బాడీ లాంగ్వేజ్‌లతో కనిపించడం భారతీయ సినిమా చరిత్రలో అప్పట్లో ఒక అరుదైన ప్రయోగంగా నిలిచింది. మేకప్, కథనం, గ్రాఫిక్స్ మరియు సాంకేతిక నిపుణుల ప్రతిభతో తెరకెక్కిన ఈ చిత్రం నాటి తరంతో పాటు నేటి యువతను కూడా ఆకట్టుకునేలా ఉంటుందని ట్రేడ్ వర్గాలు పేర్కొంటున్నాయి. కమల్ హాసన్ నట విశ్వరూపానికి ప్రతీకగా నిలిచిన ఈ సినిమా రీ-రిలీజ్ టాలీవుడ్‌లో మరోసారి భారీ క్రేజ్‌ను సొంతం చేసుకుంటోంది.
కాలం ఎంత మారినా, టెక్నాలజీ ఎంత అభివృద్ధి చెందినా కమల్ హాసన్ అంకితభావం మరియు ఆయన పోషించిన పాత్రల గొప్పతనం ఎప్పటికీ ప్రత్యేకంగానే నిలుస్తాయి. అభిమానుల కోరిక మేరకు సుదీక్ష ఎంటర్టైన్మెంట్ ఈ చిత్రాన్ని థియేటర్లలోకి తీసుకువస్తుండటంతో బాక్సాఫీస్ వద్ద మరోసారి పాత జ్ఞాపకాలు నెమరువేసుకునే అవకాశం లభిస్తోంది. సినిమాలోని ప్రతి సన్నివేశం ప్రేక్షకులను థ్రిల్ గురిచేసేలా ఉండటంతో పాటు, రీ-రిలీజ్ ట్రెండ్‌లో ఈ సినిమా సరికొత్త రికార్డులను సృష్టించే అవకాశాలు ఉన్నాయని సినీ విశ్లేషకులు భావిస్తున్నారు. నవంబర్ 28న థియేటర్లలో అడుగుపెట్టనున్న ఈ క్లాసిక్ మాస్టర్‌పీస్‌ను చూసి ఆస్వాదించడానికి సినీ ప్రియులు సిద్ధమవుతున్నారు.
Also Read: ఒకే ఇంట్లో రెండు జెండాలు..
