రోడ్డు పునర్నిర్మాణం కోసం బిజెపి ఆందోళనకు సిద్ధం

  జిన్నారం:పెద్ద కంజర్ల నుంచి శివానగర్ వరకు అధ్వానంగా మారిన రోడ్డును వెంటనే పునర్నిర్మించాలని డిమాండ్ చేస్తూ ఈ నెల 10వ తేదీ మంగళవారం పెద్ద కంజర్ల చౌరస్తా వద్ద ధర్నా నిర్వహించాలని బీజేపీ నాయకులు నిర్ణయించారు. ఈ మేరకు జిన్నారం మున్సిపాలిటీ బీజేపీ నాయకుల సమావేశం మండల అధ్యక్షుడు కే. జగన్ రెడ్డి ఆధ్వర్యంలో నిర్వహించారు. ఈ సమావేశానికి ముఖ్య అతిథిగా జిన్నారం మున్సిపాలిటీ వైస్ చైర్మన్ వంగేటి ప్రతాపరెడ్డి హాజరయ్యారు. ఈ సందర్భంగా మున్సిపాలిటీ పరిధిలో నెలకొన్న స్థానిక సమస్యలపై నాయకులు చర్చించారు. ముఖ్యంగా పెద్ద కంజర్ల నుంచి శివానగర్ వరకు రహదారి పూర్తిగా దెబ్బతినడంతో వాహనదారులు, స్థానిక ప్రజలు ఎదుర్కొంటున్న ఇబ్బందులను సమావేశంలో ప్రస్తావించారు. సంబంధిత అధికారులు స్పందించి వెంటనే రోడ్డు పునర్నిర్మాణ పనులు చేపట్టాలని డిమాండ్ చేశారు. రోడ్డు సమస్యపై చేపట్టనున్న ధర్నాకు మున్సిపాలిటీ పరిధిలోని బీజేపీ నాయకులు, కార్యకర్తలు పెద్ద సంఖ్యలో హాజరై విజయవంతం చేయాలని పిలుపునిచ్చారు. ఈ సమావేశంలో కిసాన్ మోర్చా నాయకుడు రాజిరెడ్డి, కౌన్సిలర్లు స్వప్న, రాజేందర్ రెడ్డి, వెంకటేష్, మాజీ వార్డు సభ్యులు కృష్ణ, శ్రీనివాస్ యాదవ్, పూడూరు సుధాకర్, మహేష్ యాదవ్, వినయ్ కుమార్, దుబ్బ శ్రీనివాస్, గంగు లక్ష్మణ్, సీహెచ్ వెంకటేష్ తదితరులు పాల్గొన్నారు.