అన్ని లెక్కలూ సరిచేసిన కోటంరెడ్డి సోదరులు.. రూరల్‌లో వైసీపీకి ఎదురుదెబ్బ
నెల్లూరు రూరల్, మేజర్ న్యూస్ : నెల్లూరు రూరల్ నియోజకవర్గంలో జరిగిన ఎంపీటీసీ, జెడ్పీటీసీ ఎన్నికల్లో తెలుగుదేశం పార్టీ గణనీయమైన విజయాలను నమోదు చేసింది. ఎమ్మెల్యే కోటంరెడ్డి శ్రీధర్ రెడ్డి, టీడీపీ రాష్ట్ర అధికార ప్రతినిధి కోటంరెడ్డి గిరిధర్ రెడ్డి వ్యూహరచనతో నియోజకవర్గంలో పార్టీకి అనుకూల ఫలితాలు వచ్చాయని టీడీపీ శ్రేణులు పేర్కొంటున్నాయి. నెల్లూరు రూరల్ పరిధిలో మొత్తం 12 ఎంపీటీసీ స్థానాలతో పాటు ఒక జెడ్పీటీసీ స్థానాన్ని తెలుగుదేశం పార్టీ కైవసం చేసుకుందని పార్టీ వర్గాలు వెల్లడించాయి. ఈ ఫలితాలతో వైసీపీకి నియోజకవర్గంలో గట్టి ఎదురుదెబ్బ తగిలిందని రాజకీయ వర్గాల్లో చర్చ జరుగుతోంది. ముఖ్యంగా సౌత్ మోపూరులో అన్ని పార్టీలు ఏకతాటిపైకి వచ్చిన పరిస్థితుల్లోనూ కోటంరెడ్డి గిరిధర్ రెడ్డి రూపొందించిన వ్యూహం, స్థానిక రాజకీయ సమీకరణాలు ఎన్నికల ఫలితాల్లో కీలకంగా మారాయని టీడీపీ వర్గాలు విశ్లేషిస్తున్నాయి. కోటంరెడ్డి సోదరుల సమన్వయం, పార్టీ నాయకులు, కార్యకర్తల కృషి నెల్లూరు రూరల్ ఎన్నికల ఫలితాల్లో ప్రధానంగా చర్చనీయాంశమైంది.
