బాడంగిలో టీడీపీ విజయభేరి!

బాడంగి, సూర్య : బాడంగి మండలంలో ఈ నెల 5న నిర్వహించిన ఎంపీటీసీ, జడ్పీటీసీ ఎన్నికల ఓట్ల లెక్కింపు శనివారం బొబ్బిలి పట్టణంలోని ప్రభాకర్ పాఠశాలలో ప్రశాంతంగా ముగిసింది. మండలంలోని 14 ఎంపీటీసీ స్థానాలకు జరిగిన ఎన్నికల్లో తెలుగుదేశం పార్టీ ఎనిమిది స్థానాలను కైవసం చేసుకుని స్పష్టమైన ఆధిక్యం సాధించింది. వైఎస్సార్ కాంగ్రెస్ పార్టీ నాలుగు, జనసేన ఒకటి, స్వతంత్ర అభ్యర్థి ఒక స్థానంలో విజయం సాధించారు. టీడీపీ తరఫున గొల్లాది, గజరాయునివలస, డొంకినవలస, వీరసాగరం, గూడెపువలస, వాడాడ, కోటిపల్లి, బొత్సవానివలస స్థానాల్లో అభ్యర్థులు గెలుపొందారు. వైసీపీ తరఫున బాడంగి, కోడూరు-1, కోడూరు-2, పాల్తేరు స్థానాల్లో అభ్యర్థులు విజయం సాధించారు. ముగడలో జనసేన అభ్యర్థి గెలుపొందగా, రేజేరులో  స్వతంత్ర అభ్యర్థి గొట్టాపు సుభాషిణి సుమారు 92 ఓట్ల మెజారిటీతో విజయం సాధించడం విశేషం. పలు స్థానాల్లో ఆసక్తికర ఫలితాలు నమోదయ్యాయి. ముగడలో జనసేన అభ్యర్థి సుమారు 1,151 ఓట్ల మెజారిటీతో, గొల్లాదిలో టీడీపీ అభ్యర్థి బంటు అర్జున్ సుమారు 1,080 ఓట్లతో, గజరాయునివలసలో గుణుపూరు కృష్ణకుమారి సుమారు 1,050 ఓట్లతో గెలుపొందారు. కోడూరు-1లో వైసీపీ అభ్యర్థి కండి తవిటయ్య కేవలం నాలుగు ఓట్ల స్వల్ప ఆధిక్యంతో విజయం సాధించగా, వీరసాగరంలో టీడీపీ అభ్యర్థి ఆవు సత్యనారాయణ సుమారు 36 ఓట్లతో గెలుపొందారు. బాడంగిలో వైసీపీ అభ్యర్థి కండి ధన సుమారు 240 ఓట్ల ఆధిక్యంతో విజయం సాధించారు. ఇక జడ్పీటీసీ ఓట్ల లెక్కింపులో టీడీపీ అభ్యర్థి కండి ప్రతిమకు నాలుగు రౌండ్లు పూర్తయ్యే సమయానికి నాలుగు వేలకుపైగా ఓట్ల ఆధిక్యం ఉన్నట్లు సమాచారం. మొత్తంగా బాడంగి మండల పరిషత్‌లో టీడీపీ అత్యధిక ఎంపీటీసీ స్థానాలను కైవసం చేసుకుని బలమైన స్థానాన్ని సంపాదించింది. ఈ ఫలితాలతో ఎంపీపీ పీఠంపై రాజకీయ ఆసక్తి నెలకొంది. ఎంపీపీ ఎన్నికలో ఎలాంటి పరిణామాలు చోటుచేసుకుంటాయన్నది ఆసక్తికరంగా మారింది.