భూ రీ సర్వే పారదర్శకంగా చేపట్టాలి

భీమదేవరపల్లి, మేజర్ న్యూస్, భూముల రీ సర్వే ప్రక్రియను పారదర్శకంగా, పకడ్బందీగా, వేగవంతంగా పూర్తి చేయాలని హనుమకొండ జిల్లా అదనపు కలెక్టర్ ఎన్. రవి అధికారులను ఆదేశించారు. మంగళవారం భీమదేవరపల్లి మండలం రత్నగిరి గ్రామంలో కొనసాగుతున్న రీ సర్వేను పరిశీలించి, సర్వేయర్లు, రైతులతో మాట్లాడి వివరాలు తెలుసుకున్నారు. రైతుల సహకారంతో ఎలాంటి పొరపాట్లకు తావులేకుండా సర్వే నిర్వహించాలని సూచించారు. అనంతరం వంగరలోని డాక్టర్ పీవీ రంగారావు తెలంగాణ గురుకుల బాలికల పాఠశాల, కళాశాలను సందర్శించి భోజన నాణ్యత, వంటగదిలోని సరుకులను తనిఖీ చేశారు. విద్యార్థినులకు నాణ్యమైన భోజనం అందించాలని, ఎలాంటి ఇబ్బందులు కలగకుండా చూడాలన్నారు. ప్రభుత్వ ప్రాథమిక పాఠశాలను సైతం సందర్శించి సదుపాయాలను పరిశీలించారు. ఈ కార్యక్రమంలో భూముల కొలతల శాఖ ఏడీ నూర్‌సింగ్, తహసీల్దార్ రాజేష్, ప్రిన్సిపల్ అఫ్రిన్ సుల్తానా, తదితరులు పాల్గొన్నారు.

రిపోర్టర్ :రామకృష్ణ, భీమదేవరపల్లి, హనుమకొండ జిల్లా