అంబాజీపేట ఎంపీపీ రేసులో అనంతలక్ష్మి తులసి

సూర్య ఆంధ్రప్రదేశ్ డెస్క్:  డాక్టర్ బి.ఆర్. అంబేద్కర్ కోనసీమ జిల్లా అంబాజీపేట మండల పరిషత్ అధ్యక్ష పదవి ఎన్నికకు రంగం సిద్ధమైంది. రాష్ట్రవ్యాప్తంగా మండల పరిషత్ అధ్యక్ష, ఉపాధ్యక్ష పదవుల ఎన్నికలకు రాష్ట్ర ఎన్నికల సంఘం షెడ్యూల్ విడుదల చేయడంతో స్థానిక రాజకీయ వాతావరణం ఒక్కసారిగా వేడెక్కింది. ఈ నెల 19, 20వ తేదీలలో ఎన్నికల నిర్వహణకు సర్వసన్నద్ధంగా ఉండాలని ఎన్నికల సంఘం అధికారులను ఆదేశించడంతో మండల కేంద్రంలో రాజకీయ సందడి మొదలైంది.

ఎంతో రాజకీయ చైతన్యం కలిగిన అంబాజీపేట మండల పరిషత్ పీఠాన్ని కూటమి ఒప్పందంలో భాగంగా తెలుగుదేశం పార్టీకి కేటాయించడంతో ఆ పార్టీ శ్రేణుల్లో నూతనోత్సాహం కనిపిస్తోంది. మండలంలో మొత్తం 18 ఎంపీటీసీ స్థానాలు ఉండగా, అందులో ఏకంగా 14 స్థానాలను కూటమి అభ్యర్థులు కైవసం చేసుకుని తిరుగులేని ఆధిక్యాన్ని సొంతం చేసుకున్నారు. ఎంపీపీ అధ్యక్ష పదవి జనరల్ మహిళ కేటగిరీకి రిజర్వ్ కావడంతో, కొర్లపాటివారిపాలెం ప్రాదేశిక నియోజకవర్గం నుంచి ఘన విజయం సాధించిన టిడిపి సీనియర్ నాయకులు, 007 క్లస్టర్ ఇన్‌ఛార్జి గణపతి వీర రాఘవులు సతీమణి గణపతి అనంతలక్ష్మి తులసి పేరు మండల అధ్యక్ష రేసులో ప్రముఖంగా ముందుకొచ్చింది.

క్షేత్రస్థాయిలో పార్టీకి వీర రాఘవులు అందించిన విశేష సేవలు, ప్రజల్లో ఆయనకున్న పట్టు, నిబద్ధతను పరిగణనలోకి తీసుకున్న కూటమి అగ్ర నాయకత్వం ఆయన సతీమణి అనంతలక్ష్మి తులసికి అధ్యక్ష బాధ్యతలు అప్పగించేందుకు కూటమి నాయకత్వం అంగీకారం తెలిపినట్లు తెలిసింది.