గర్భిణులు, బాలింతలు, చిన్నారులకు పౌష్టికాహారం అందించాలి - అదనపు కలెక్టర్ బి. శ్రీరాములు

సూర్య - పెద్దపల్లి: జిల్లాలో గర్భిణులు, బాలింతలు, చిన్నారులకు మెరుగైన పోషకాహారం, ఆరోగ్య సేవలు అందించాలని అదనపు కలెక్టర్ బి. శ్రీరాములు అధికారులను ఆదేశించారు. మంగళవారం ఐడీఓసీలో ఐసిడిఎస్ కార్యక్రమాల అమలుపై నిర్వహించిన సమీక్ష సమావేశంలో ఆయన మాట్లాడారు.ప్రతి గర్భిణి, బాలింతను అంగన్‌వాడీ కేంద్రాల్లో నమోదు చేసి ప్రభుత్వ పోషకాహారాన్ని సక్రమంగా అందించాలన్నారు. చిన్నారుల బరువు, ఎత్తును క్రమం తప్పకుండా పరిశీలిస్తూ పోషకాహార లోపం ఉన్నవారిని గుర్తించి ప్రత్యేక శ్రద్ధ తీసుకోవాలని సూచించారు. నూతన అంగన్‌వాడీ భవన నిర్మాణాలను నాణ్యతతో నిర్ణీత గడువులోగా పూర్తి చేయాలని ఆదేశించారు.అంగన్‌వాడీ కేంద్రాల్లో పారిశుద్ధ్యం, తాగునీరు, ప్రీ-స్కూల్ విద్యపై ప్రత్యేక దృష్టి సారించాలని, అధికారులు క్షేత్రస్థాయిలో పర్యవేక్షిస్తూ ఐసిడిఎస్ కార్యక్రమాలను సమర్థవంతంగా అమలు చేయాలని తెలిపారు. సమావేశంలో సీడీపీఓలు అనిత, అలేఖ్య, సంపదకుమారి, పుష్పలత, సూపర్వైజర్లు, అధికారులు పాల్గొన్నారు.