మెలియాపుట్టి ఎంపీపీ పీఠం దినకర్‌కేనా?
వైస్ ఎంపీపీగా సలాన రోహిణి పేరు తెరపైకి
15 ఎంపీటీసీ స్థానాల్లో కూటమికి 12 స్థానాలు
మెలియాపుట్టి. నవంబర్ 10. మేజర్ న్యూస్... మెలియాపుట్టి మండల పరిషత్ అధ్యక్ష, ఉపాధ్యక్ష పదవుల ఎంపికపై రాజకీయ వర్గాల్లో ఆసక్తికర చర్చ సాగుతోంది. ఎంపీపీ పీఠాన్ని తెలుగుదేశం పార్టీ దక్కించుకోనుండగా, అధ్యక్ష పదవికి మర్రిపాడు-సి ఎంపీటీసీగా విజయం సాధించిన బైరసింగి దినకర్ పేరు ప్రముఖంగా వినిపిస్తోంది. ఆయనకు ఎంపీపీ బాధ్యతలు అప్పగించాలని కూటమి నాయకులు భావిస్తున్నట్లు సమాచారం. మరోవైపు వైస్ ఎంపీపీ పదవికి కోసమాల ఎంపీటీసీగా గెలుపొందిన సలాన రోహిణి పేరు పరిశీలనలో ఉన్నట్లు తెలుస్తోంది.
మెలియాపుట్టి మండలంలోని 15 ఎంపీటీసీ స్థానాలకు జరిగిన ఎన్నికల్లో తెలుగుదేశం పార్టీ తొమ్మిది స్థానాలను కైవసం చేసుకుంది. జనసేన రెండు స్థానాల్లో విజయం సాధించగా, వైఎస్సార్‌సీపీ మూడు స్థానాలకే పరిమితమైంది. ఒక స్థానంలో స్వతంత్ర అభ్యర్థి గెలుపొందారు. దీంతో స్వతంత్ర అభ్యర్థి మద్దతుతో కూటమి బలం 12 స్థానాలకు చేరింది. ఈ ఫలితాలు మండల పరిషత్‌పై కూటమికి స్పష్టమైన ఆధిక్యాన్ని అందించాయి.
ఎన్నికల ఫలితాలు వెలువడటంతో ఇప్పుడు ఎంపీపీ, వైస్ ఎంపీపీ పదవులు ఎవరిని వరించనున్నాయన్న అంశం చర్చనీయాంశంగా మారింది. పీఏసీఎస్ అధ్యక్షుడు సలాన మోహనరావు కోడలు సలాన రోహిణికి వైస్ ఎంపీపీ అవకాశం కల్పించనున్నట్లు ప్రచారం జరుగుతోంది. సామాజిక, రాజకీయ సమీకరణాలతో పాటు పార్టీ నాయకుల అభిప్రాయాలను పరిగణనలోకి తీసుకుని పదవుల కేటాయింపుపై నిర్ణయం తీసుకోనున్నట్లు తెలుస్తోంది.
మండలంలో స్పష్టమైన మెజార్టీ సాధించిన కూటమి నేతలు పదవుల పంపకంపై ఎలాంటి నిర్ణయం తీసుకుంటారన్నది ఆసక్తికరంగా మారింది. బైరసింగి దినకర్, సలాన రోహిణి పేర్లు ప్రధానంగా వినిపిస్తున్నప్పటికీ అధికారిక ప్రకటన వెలువడాల్సి ఉంది. దీంతో మెలియాపుట్టి మండల రాజకీయాల్లో ఎంపీపీ, వైస్ ఎంపీపీ ఎన్నికలపై ఉత్కంఠ నెలకొంది.
