ఉమ్మడి కృష్ణా జిల్లా సీనియర్ ఫెన్సింగ్ జట్టు ఎంపిక

విజయవాడ మేజర్ న్యూస్ : పురుషులు, మహిళల ఉమ్మడి కృష్ణా జిల్లా సీనియర్ ఫెన్సింగ్ జట్టు ఎంపికలు ఈ నెల 12వ తేదీన విజయవాడలో నిర్వహించనున్నట్లు కృష్ణా జిల్లా ఫెన్సింగ్ అసోసియేషన్ కార్యదర్శి నాగం సతీష్ బాబు తెలిపారు. పైపుల రోడ్ జంక్షన్ సమీపంలోని ఎస్. కళ్యాణ మండపంలో మధ్యాహ్నం 4 గంటల నుంచి ఎంపికల నమోదు ప్రక్రియ ప్రారంభమవుతుందని పేర్కొన్నారు. 2026 అక్టోబర్ 31 నాటికి లేదా అంతకుముందు 13 ఏళ్ల వయస్సు పూర్తిచేసుకున్న ఫెన్సింగ్ క్రీడాకారులు అర్హులని తెలిపారు. ఫెన్సింగ్ కత్తులతో ఆడే క్రీడ కావడంతో, ఇప్పటివరకు ఈ ఆటలో పాల్గొనని క్రీడాకారులు గుర్తింపు పొందిన ఫెన్సింగ్ శిక్షకుడి వద్ద కనీసం ఆరు నెలలు శిక్షణ పొంది ఉండాలని సూచించారు. శిక్షణ ధ్రువీకరణ పత్రం, జనన ధ్రువీకరణ పత్రం, ఫెన్సింగ్ అసోసియేషన్ ఆఫ్ ఇండియా గుర్తింపు పత్రం, ఆధార్ కార్డు, రెండు పాస్‌పోర్ట్ సైజు ఫొటోలతో హాజరుకావాలని కోరారు. జిల్లా స్థాయిలో ఎంపికైన క్రీడాకారులు నవంబర్ 15న కాకినాడలోని లక్ష్య స్కూల్‌లో జరిగే రాష్ట్రస్థాయి పోటీల్లో పాల్గొంటారని తెలిపారు. రాష్ట్రస్థాయిలో ఎంపికైన వారు నవంబర్ 27 నుంచి పంజాబ్ రాష్ట్రం అమృత్‌సర్‌లోని గురునానక్ విశ్వవిద్యాలయం ఇండోర్ స్టేడియంలో జరిగే జాతీయ సీనియర్ ఫెన్సింగ్ ఛాంపియన్‌షిప్‌లో పాల్గొంటారని పేర్కొన్నారు. మరిన్ని వివరాలకు 9553528888 నంబర్‌లో సంప్రదించాలని నాగం సతీష్ బాబు సూచించారు.          

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.