20కి 20 ధ్రువీకరణ పత్రాలు అందుకున్న టీడీపీ ఎంపీటీసీలు

సంతబొమ్మాళి, నవంబర్ 10, మేజర్ న్యూస్ :

సంతబొమ్మాళి మండలంలో తెలుగుదేశం పార్టీ ప్రభంజనం మరోసారి స్పష్టమైంది. ఇటీవల జరిగిన స్థానిక సంస్థల ఎన్నికల్లో మండలంలోని 20 ఎంపీటీసీ స్థానాలనూ కైవసం చేసుకున్న టీడీపీ బలపరిచిన అభ్యర్థులు మంగళవారం ఎన్నికల రిటర్నింగ్ అధికారి డి. గోపికృష్ణ చేతుల మీదుగా ధ్రువీకరణ పత్రాలు అందుకున్నారు. మండలంలోని మొత్తం 20 ఎంపీటీసీ స్థానాలకు జరిగిన ఎన్నికల్లో టీడీపీ బలపరిచిన అభ్యర్థులు వైసీపీ అభ్యర్థులపై ఘనవిజయం సాధించి అన్ని స్థానాలనూ క్లీన్‌స్వీప్ చేశారు. ఈ విజయంతో మండల పరిషత్‌పై తెలుగుదేశం పార్టీ పూర్తి ఆధిపత్యాన్ని సాధించింది. ఎన్నికల ఫలితాల అనంతరం నూతనంగా ఎన్నికైన సభ్యులకు అధికారికంగా ధ్రువీకరణ పత్రాలు అందజేశారు.
ఈ సందర్భంగా టీడీపీ మండల అధ్యక్షుడు సుగ్గు శాంతి స్వరూప్ రెడ్డి మాట్లాడుతూ ప్రజలు తమపై ఉంచిన నమ్మకాన్ని, విశ్వాసాన్ని వమ్ము చేయకుండా పనిచేస్తామని తెలిపారు. మంత్రి కింజరాపు అచ్చెన్నాయుడు సహకారంతో గ్రామాల్లో నెలకొన్న సమస్యలను గుర్తించి వాటి పరిష్కారానికి ప్రత్యేక చొరవ చూపుతామన్నారు. గ్రామీణ ప్రాంతాల్లో మౌలిక సదుపాయాల కల్పనకు ప్రాధాన్యతనిస్తూ సంతబొమ్మాళి మండలాన్ని అభివృద్ధి పథంలో ముందుకు తీసుకెళ్లేందుకు నూతన ఎంపీటీసీ సభ్యులంతా సమష్టిగా కృషి చేస్తారని స్పష్టం చేశారు.
20 స్థానాలు ఏకపక్ష విజయం అభివృద్ధే లక్ష్యంగా నూతన ఎంపీటీసీల అడుగులు పడుతుండటంతో మండల రాజకీయాల్లో టీడీపీ శ్రేణుల్లో నూతన ఉత్సాహం నెలకొంది.