ప్రశ్నించే గొంతును కట్టడిచేస్తే ప్రతిఘటిస్తాం -కూటమి ప్రభుత్వానికి ఎస్ఎఫ్ఐ నేతల హెచ్చరిక

ఎడ్యుకేషన్ స్టాఫ్ రిపోర్టర్ : కూటమి ప్రభుత్వం విశ్వవిద్యాలయాల్లో సమస్యలపై ప్రశ్నించే గొంతులను కట్టడి చేసే ప్రయత్నం చేయడం దారుణమని అలాంటి చర్యలు చేపడితే ప్రతిఘటిస్తామని ఎస్ఎఫ్ఐ నేతలు హెచ్చరించారు. మంగళవారం ఎస్వీయూ ప్రధాన ద్వారం ఎదుట వారు ఆంధ్రా యూనివర్సిటీలో ఎస్ఎఫ్ఐ నాయకులకు క్రమశిక్షణా రాహిత్య నోటీసులు ఇవ్వడంపై నిరసన వ్యక్తం చేశారు. అనంతరం నేతలు మాట్లాడుతూ 50 ఏళ్లకు పైగా చరిత్ర కలిగిన ఎస్ఎఫ్ఐ నాయకులను ఇలాంటి నోటీసులతో బెదిరించలేరని అన్నారు. ఢిల్లీలో నీట్ పేపర్ లీకేజీకి వ్యతిరేకంగా పోరాడి ప్రధానమంత్రిని సైతం ప్రశ్నించిన చరిత్ర ఎస్ఎఫ్ఐకు ఉందని గుర్తుచేశారు. ప్రజాస్వామ్య దేశంలో హక్కులకు విరుద్ధంగా జరిగే ఇటువంటి చర్యలను తీవ్రంగా ప్రతిఘటిస్తామని హెచ్చరించారు. కూటమి ప్రభుత్వం అధికారంలోకి వచ్చిన తర్వాత విద్యార్థి సంఘాల నాయకులపై అణచివేత ధోరణితో వ్యవహరిస్తోందని ఆగ్రహం వ్యక్తం చేశారు. ఇప్పటికే ప్రభుత్వ విద్యాసంస్థల్లో విద్యార్థి సంఘాలను అనుమతించకూడదనే విధంగా ప్రభుత్వం జీవో తీసుకొచ్చిందన్నారు. ఆంధ్రా యూనివర్సిటీలో విద్యార్థుల సమస్యలపై పోరాడుతున్న ఎస్ఎఫ్ఐ నాయకులతో పాటు ఇతర విద్యార్థి సంఘాల నాయకులకు క్రమశిక్షణా రాహిత్యం పేరుతో యూనివర్సిటీ అధికారులు నోటీసులు జారీ చేయడం దారుణమని ఆగ్రహం వ్యక్తం చేశారు. ఎస్ఎఫ్ఐ జిల్లా అధ్యక్ష, కార్యదర్శులు పవిత్ర, అక్బర్, జిల్లా ఉపాధ్యక్షులు అశోక్, వినోద్, యూనివర్సిటీ అధ్యక్ష, కార్యదర్శులు అనిత, నరసన్న, నాయకులు తిప్పేస్వామి, ప్రవీణ్, వర్షిణి, దీపిక, ప్రేమ్, చరణ్ పాల్గొన్నారు.

సీఎం గౌడ్ తిరుపతి స్టాప్ రిపోర్టర్