అంగన్‌వాడీ కేంద్రాలకు నాణ్యమైన కందిపప్పు సరఫరా చేయాలి
మెదక్, : జిల్లాలోని అంగన్‌వాడీ కేంద్రాలకు నాణ్యమైన కందిపప్పు సరఫరా చేయాలని అదనపు కలెక్టర్ నగేష్ టెండర్లు దక్కించుకున్న గుత్తేదారులను ఆదేశించారు. నాణ్యత విషయంలో ఎలాంటి రాజీ పడకుండా ప్రభుత్వ నిబంధనల ప్రకారం సరుకులు అందించాలని స్పష్టం చేశారు.మంగళవారం మెదక్ జిల్లా కలెక్టరేట్ కార్యాలయంలో మహిళా, శిశు, వికలాంగులు మరియు వయోవృద్ధుల సంక్షేమ శాఖ ఆధ్వర్యంలో అదనపు కలెక్టర్ నగేష్ ముఖ్య అతిథిగా పాల్గొని కందిపప్పు సరఫరాకు సంబంధించిన టెండర్ల ప్రక్రియను పారదర్శకంగా నిర్వహించారు.ఈ సందర్భంగా అదనపు కలెక్టర్ మాట్లాడుతూ జిల్లాలోని 1,076 అంగన్‌వాడీ కేంద్రాలకు అవసరమైన కందిపప్పును ఒక కిలో ప్యాకెట్ల రూపంలో సరఫరా చేసేందుకు గతంలోనే టెండర్లకు ఆహ్వానం పలికినట్లు తెలిపారు. ప్రభుత్వ వాణిజ్య పనుల శాఖలో నమోదైన మిల్లర్లు, టోకు వ్యాపారులు, ప్రభుత్వ సంస్థలు, ఇతర అర్హత కలిగిన వ్యాపార సంస్థల నుంచి టెండర్లను స్వీకరించినట్లు పేర్కొన్నారు.ఇందులో భాగంగా మంగళవారం టెండర్ల ప్రక్రియ నిర్వహించి, అర్హత, సామర్థ్యం కలిగిన వ్యాపారులకు కందిపప్పు సరఫరా బాధ్యతలు అప్పగించినట్లు తెలిపారు. అంగన్‌వాడీ కేంద్రాలకు సరఫరా చేసే కందిపప్పు నాణ్యత ప్రమాణాలకు అనుగుణంగా ఉండాలని, నిర్ణీత సమయంలో సరుకులు అందించాలని గుత్తేదారులకు సూచించారు.అంగన్‌వాడీ కేంద్రాల ద్వారా చిన్నారులు, లబ్ధిదారులకు అందించే ఆహార పదార్థాల నాణ్యతపై ప్రత్యేక శ్రద్ధ వహించాలని అధికారులకు సూచించారు.ఈ కార్యక్రమంలో సంక్షేమ అధికారి హేమ భార్గవి, పౌరసరఫరాల అధికారి నిత్యానంద్, మేనేజర్ జగదీష్, డీఈఓ రాజు, రవాణా శాఖ అధికారి శ్రీకాంత్ చక్రవర్తి, సంబంధిత గుత్తేదారులు తదితరులు పాల్గొన్నారు.
