యువత మత్తు పదార్థాలకు దూరంగా ఉండాలి - న్యాయ సేవాధికార సంస్థ కార్యదర్శి, సీనియర్ సివిల్ జడ్జి శ్రీనిజ కోయిర్కర్

సూర్య - పెద్దపల్లి రూరల్ 03: యువత మద్యం, మత్తు పదార్థాలకు అలవాటు పడి భవిష్యత్తును నాశనం చేసుకోవద్దని న్యాయ సేవాధికార సంస్థ కార్యదర్శి, సీనియర్ సివిల్ జడ్జి శ్రీనిజ కోయిర్కర్ సూచించారు. మండలంలోని చీకురాయి గ్రామంలో నిర్వహించిన న్యాయ విజ్ఞాన సదస్సులో ఆమె ముఖ్య అతిథిగా పాల్గొని మాట్లాడారు.
పిల్లల ప్రవర్తనపై తల్లిదండ్రులు ఎప్పటికప్పుడు దృష్టి సారిస్తూ, వారిని చెడు అలవాట్లకు దూరంగా ఉంచాలని కోరారు. మైనర్లకు వాహనాలు ఇవ్వడం చట్టరీత్యా నేరమని, దీనివల్ల రోడ్డు ప్రమాదాలు జరిగే ప్రమాదం ఉందని హెచ్చరించారు. ప్రతి ఒక్కరూ ట్రాఫిక్ నిబంధనలు పాటిస్తూ రహదారి భద్రతకు సహకరించాలని పేర్కొన్నారు. ప్రతి ఒక్కరూ చట్టాలపై అవగాహన కలిగి ఉండటంతో పాటు, తమ హక్కులు, బాధ్యతలను తెలుసుకోవాలని అన్నారు.
కార్యక్రమంలో గ్రామ సర్పంచ్ ఓదెల శ్రీనివాస్, పంచాయతీ కార్యదర్శి శంకరయ్య, వార్డు సభ్యులు, న్యాయవాదులు నరేష్, ఝాన్సీ తదితరులు పాల్గొన్నారు.