వర్షం సాక్షిగా ఎన్నికల ఏర్పాట్లు. జోరువానలోనూ అధికారుల కసరత్తు - ఎన్నికల నిర్వహణకు ఏర్పాట్లు పూర్తి – ఎన్నికల అధికారి

. అనపర్తి, మేజర్ న్యూస్: స్థానిక సంస్థల ఎన్నికల నేపథ్యంలో అనపర్తి నియోజకవర్గంలో ఎన్నికల ఏర్పాట్లు ముమ్మరంగా కొనసాగుతున్నాయి. ఒకవైపు ఎడతెరిపి లేకుండా కురుస్తున్న వర్షాలు అధికారులకు ఆటంకంగా మారుతున్నప్పటికీ, మరోవైపు ఎన్నికలను సజావుగా నిర్వహించేందుకు అధికారులు తమ విధులను కొనసాగిస్తున్నారు. వర్షాన్ని సైతం లెక్కచేయకుండా ఉన్నతాధికారుల ఆదేశాల మేరకు పోలింగ్ కేంద్రాల వద్ద అవసరమైన ఏర్పాట్లను పూర్తి చేశారు. ఈ సందర్భంగా ఎన్నికల అధికారి మాట్లాడుతూ మండల పరిధిలోని ఏర్పాటు చేసిన 90 పోలింగ్ కేంద్రాల వద్ద  ఏర్పాటు పూర్తి చేయడం జరిగిందని, ఓటర్లకు ఎలాంటి ఇబ్బందులు కలగకుండా ముందస్తు చర్యలు చేపట్టడం,పోలింగ్ కేంద్రాల్లో మౌలిక సదుపాయాలు, విద్యుత్, తాగునీరు, పారిశుధ్యం తదితర అంశాలపై ప్రత్యేక దృష్టి మొండి చర్యలు తీసుకోవడం జరిగిందని, ఎన్నికల సిబ్బందికి అవసరమైన సామగ్రి, బ్యాలెట్ పత్రాలు, బ్యాలెట్ బాక్సులు, ఇతర ఎన్నికల సామగ్రి పంపిణీకి సంబంధించిన ఏర్పాట్లను పూర్తి చేయడం జరిగిందని,  పోలింగ్ విధుల్లో పాల్గొనే సిబ్బందికి ఎలాంటి అసౌకర్యం కలగకుండా చర్యలు చేపట్టమని అన్నారు. ఇప్పటికే ప్రతి పోలింగ్ కేంద్ర వద్దకు పోలింగ్ అధికారులతో పాటు పోలీస్ అధికారులు కూడా చేరుకుని ఎన్నికల నిర్వహణ పనులలో నిమగ్నమై ఉన్నారని అన్నారు. వర్షాలు కురుస్తున్నప్పటికీ ఎన్నికల నిర్వహణకు సంబంధించి ముందస్తు చర్యలు తీసుకున్నామని వెల్లడించారు.