అకాల వర్షంతో అన్నదాతల ఆగమాగం చేతికొచ్చిన పంట నేలపాలు.. రైతులకు తీరని నష్టం..!
సూర్య - వీణవంక :మండలంలోని పలు గ్రామాల్లో కురుస్తున్న అకాల వర్షాలు రైతన్నలను ఆందోళనకు గురిచేస్తున్నాయి. ఎన్నో రోజులుగా కష్టపడి సాగు చేసిన పంటలు చేతికొచ్చే సమయంలో వర్షం రూపంలో ప్రకృతి విరుచుకుపడటంతో రైతులు తీవ్ర ఇబ్బందులు ఎదుర్కొంటున్నారు.పంట కోతకు సిద్ధంగా ఉన్న సమయంలో కురుస్తున్న వర్షాలతో పొలాల్లో నీరు నిలిచిపోవడంతో పంటలు దెబ్బతింటున్నాయి. ఇప్పటికే కోసి కల్లాల్లో ఆరబెట్టిన ధాన్యం వర్షానికి తడిసిపోవడంతో రైతులు తీవ్ర ఆవేదన వ్యక్తం చేస్తున్నారు. మరోవైపు తడిసిన ధాన్యాన్ని కాపాడుకునేందుకు రైతులు నానా అవస్థలు పడుతున్నారు.
ఏడాది పొడవునా పెట్టుబడులు పెట్టి, కుటుంబ సభ్యులతో కలిసి శ్రమించి పండించిన పంట కళ్ల ముందే దెబ్బతింటుండటంతో అన్నదాతలు ఆందోళన చెందుతున్నారు. ప్రకృతి వైపరీత్యాలతో నష్టపోతున్న తమను ప్రభుత్వం ఆదుకోవాలని, సంబంధిత వ్యవసాయ అధికారులు గ్రామాల్లో పర్యటించి పంట నష్టాన్ని అంచనా వేయాలని రైతులు కోరుతున్నారు.
పంట చేతికొచ్చే సమయంలో అకాల వర్షాలు కురవడంతో రైతుల ఆశలు ఆవిరవుతున్నాయి. ప్రభుత్వం స్పందించి నష్టపోయిన రైతులకు తగిన పరిహారం అందించాలని అన్నదాతలు విజ్ఞప్తి చేస్తున్నారు.
