గంజాయి అక్రమ రవాణా కేసుల్లో నిందితుడు సిగిలి వెంకటేష్ పై పీడీ యాక్ట్.... * విజయనగరం జిల్లా ఎస్పీ ఎఆర్ దామోదర్ *

విజయనగరం, సూర్య : విజయనగరం జిల్లా తెర్లాం మండలం రంగప్పవలస గ్రామానికి చెందిన సిగిలి వెంకటేష్ (29సం.లు) అనే నిందితుడు తరచూ గంజాయి అక్రమ రవాణాకు, అసాంఘిక కార్యకలాపాలకు పాల్పడుతున్న నేపథ్యంలో అతడిపై పీడీ యాక్ట్ అమలు చేసి, అక్టోబర్ 31న విశాఖపట్నం సెంట్రల్ జైలుకు తరలించినట్లు జిల్లా ఎస్పీ ఎఆర్ దామోదర్  తెలిపారు.
జిల్లా ఎస్పీ  ఎఆర్ దామోదర్  మాట్లాడుతూ సిగిలి వెంకటేష్ పై ఇప్పటికే తెర్లాం పోలీస్ స్టేషన్‌లో ఒకటి, బుదరాయవలస పోలీస్ స్టేషన్ పరిధిలో ఒకటి —మొత్తం రెండు గంజాయి కేసులు నమోదయ్యాయన్నారు. ఆయా కేసుల్లో నిందితుడి వద్ద నుండి మొత్తం 16.570 కిలోల గంజాయిని స్వాధీనం చేసుకున్నట్లు వెల్లడించారు. నిందితుడు తన నేర ప్రవృత్తిని మార్చుకోకుండా పదేపదే గంజాయి అక్రమ రవాణాకు పాల్పడుతూ, చట్టాన్ని ఉల్లంఘిస్తున్నందున, నేరాల నియంత్రణ మరియు శాంతిభద్రతల పరిరక్షణలో భాగంగా అతడిపై పీడీ యాక్ట్ కింద నిర్బంధ చర్యలను బొబ్బిలి రూరల్ సిఐ మల్లికార్జునరావు చేపట్టినట్లు తెలిపారు.  జిల్లాలో గంజాయి అక్రమ రవాణా, విక్రయాలకు పాల్పడుతూ పదేపదే నేరాలకు పాల్పడే వారిపై కఠినమైన చట్టపరమైన చర్యలు తీసుకుంటామని ఎస్పీ హెచ్చరించారు. శాంతిభద్రతలకు విఘాతం కలిగించే వ్యక్తుల పట్ల ఎట్టి పరిస్థితుల్లోనూ ఉపేక్షించేది లేదని, ప్రజల భద్రతకు భంగం కలిగించే కార్యకలాపాలను అరికట్టేందుకు పోలీసు శాఖ నిరంతరం చర్యలు చేపడుతుందని స్పష్టం చేశారు. నేరాల నియంత్రణ, ముందస్తు నేర నియంత్రణ చర్యల్లో భాగంగా సిగిలి వెంకటేష్ ను అదుపులోకి తీసుకొని, 1 సం. వరకు బెయిల్ రాకుండా చర్యలు చేపట్టి, అతడిని విశాఖ సెంట్రల్ జైలుకి తరలించామని జిల్లా ఎస్పీ ఎఆర్ దామోదర్  తెలిపారు.