జిన్నారంలో అయ్యప్ప మండల దీక్షలు ప్రారంభం

జిన్నారం;జిన్నారం మున్సిపల్ కేంద్రానికి చెందిన అయ్యప్ప స్వామి భక్తులు ఆదివారం 45 రోజుల మండల దీక్షలను భక్తిశ్రద్ధలతో ప్రారంభించారు. జిన్నారం కోదండ రామాలయంలోని సన్నిధానంతో పాటు వీరన్నగూడెం సమీపంలోని అయ్యప్ప స్వామి ఆలయంలో ప్రత్యేక పూజలు, అభిషేకాలు నిర్వహించిన అనంతరం సంతోష్, ఆనంద్ గురుస్వామిల ఆధ్వర్యంలో భక్తులు మండల దీక్షను స్వీకరించారు. స్వామివారి నామస్మరణతో ఆలయ పరిసరాలు ఆధ్యాత్మిక వాతావరణాన్ని సంతరించుకున్నాయి. దీంతో జిన్నారంలోని కోదండ రామాలయ అయ్యప్ప సన్నిధానం అయ్యప్ప స్వాములతో సందడిగా మారింది. మండల దీక్షలో భాగంగా 45 రోజుల పాటు నియమ నిష్ఠలతో స్వామివారిని ఆరాధిస్తూ దీక్షను కొనసాగించనున్నట్లు భక్తులు తెలిపారు. ఈ కార్యక్రమంలో గురుస్వాములు, అయ్యప్ప స్వాములు, వారి కుటుంబ సభ్యులు పాల్గొన్నారు.