ప్రభుత్వ డిగ్రీ కళాశాల విద్యార్థుల క్షేత్ర పర్యటన

సూర్య భైంసా;;ప్రభుత్వ డిగ్రీ కళాశాల,భైంసాలోని జంతుశాస్త్ర విభాగం మరియు భౌతిక శాస్త్ర విభాగాల ఆధ్వర్యంలో విద్యార్థులకు ప్రాయోగిక పరిజ్ఞానాన్ని అందించాలనే ఉద్దేశంతో క్షేత్ర పర్యటన నిర్వహించడం జరిగింది.ఈ పర్యటనలో భాగంగా విద్యార్థులు భైంసా ఏరియా ప్రభుత్వ ఆసుపత్రిని సందర్శించారు. అక్కడ ఎక్స్-రే కిరణాల వినియోగం, వైద్య పరీక్షల్లో వాటి ప్రాముఖ్యత,అల్ట్రాసౌండ్ పరీక్షల విధానం, ఫిజియోఎలక్ట్రిక్ ప్రభావం గురించి తెలుసుకున్నారు.అలాగే వైద్య రంగంలో భౌతిక శాస్త్ర సూత్రాలు ఏవిధంగా ఉపయోగపడుతున్నాయో వైద్య సిబ్బంది ద్వారా అవగాహన పొందారు.అనంతరం విద్యార్థులు భైంసా చేపల మార్కెట్ ను సందర్శించారు.అక్కడ వివిధ రకాల చేపలను పరిశీలించి, చేపల రకాలు, వాటి లక్షణాలు, ఆహారంగా వాటి ప్రాముఖ్యత, చేపల విక్రయ విధానం మరియు మత్స్య సంపద గురించి తెలుసుకున్నారు. చేపల మార్కెట్‌లో ఉపయోగించే ఎలక్ట్రానిక్ పరికరాలు,డిజిటల్ తూకం యంత్రాల పనితీరును కూడా పరిశీలించారు.ఈ క్షేత్ర పర్యటన ద్వారా విద్యార్థులకు తరగతి గదిలో నేర్చుకున్న సైద్ధాంతిక అంశాలను ప్రత్యక్షంగా పరిశీలించే అవకాశం లభించింది. విజ్ఞాన శాస్త్రాన్ని నిత్యజీవితంలో మరియు వివిధ రంగాల్లో ఎలా ఉపయోగిస్తున్నారో తెలుసుకున్నారు.ఈ కార్యక్రమం విద్యార్థుల్లో శాస్త్రీయ దృక్పథాన్ని, పరిశీలనా శక్తిని మరియు ప్రాయోగిక పరిజ్ఞానాన్ని పెంపొందించడానికి ఎంతగానో దోహదపడింది అని కళాశాల ఇంచార్జి జె.భీమ్ రావు  తెలియజేసినారు జంతు శాస్త్ర అధ్యాపకులు డాక్టర్ కోసర్ సంతోష్ కుమార్ గారు మరియు భౌతిక శాస్త్ర అధ్యాపకురాలు కోసారి శ్రావణ్య విద్యార్థులు పాల్గొన్నారు.