బీరంగూడలో డ్రగ్స్ కలకలం.. ఇద్దరు అరెస్ట్... రూ.1.26 లక్షల విలువైన ఎండీఎంఏ స్వాధీనం

అమీన్‌పూర్‌,మేజర్ న్యూస్ : మాదకద్రవ్యాల అక్రమ రవాణాపై సైబరాబాద్ పోలీసులు ఉక్కుపాదం మోపుతున్నారు. విశ్వసనీయ సమాచారం మేరకు అమీన్‌పూర్ పోలీస్‌స్టేషన్ పరిధిలోని బీరంగూడ సోమవారం మార్కెట్ బస్టాప్ సమీపంలో పోలీసులు దాడి నిర్వహించి ఇద్దరు యువకులను పట్టుకున్నారు.ఈ మేరకు సీఐ ప్రవీణ్ రెడ్డి తెలిపిన వివరాల ప్రకారం  కర్ణాటకకు చెందిన హృతిక్ డి. పాటిల్ (26), పాశమైలారానికి చెందిన సిద్ధార్థ్ (25)ను అదుపులోకి తీసుకున్నారు. వారి నుంచి 10.50 గ్రాముల ఎండీఎంఏ డ్రగ్స్ (విలువ సుమారు రూ.1.26 లక్షలు), రెండు మొబైల్ ఫోన్లను స్వాధీనం చేసుకున్నారు.విచారణలో బెంగళూరుకు చెందిన సలోజ్ వద్ద డ్రగ్స్ కొనుగోలు చేసినట్లు నిందితులు చెప్పారని అన్నారు. పరారీలో ఉన్న సలోజ్ కోసం పోలీసులు గాలింపు చేపట్టారు.అరెస్టయిన ఇద్దరిపై కేసు నమోదు చేసి  జ్యుడీషియల్ రిమాండ్‌కు తరలించారు.