రాప్తాడు పాఠశాలలో విద్యార్థినిపై దాడి అమానుషం

నిందితుడిని కఠినంగా శిక్షించాలి.. పాఠశాలల్లో భద్రతను పటిష్ఠం చేయాలి
"లయన్ డా. ఎం.కె. మిశ్రో డిమాండ్"

ఎల్ ఎన్ పేట నవంబర్ 1, మేజర్ న్యూస్:

అనంతపురం జిల్లా రాప్తాడులోని జిల్లా పరిషత్ ఉన్నత పాఠశాలలో పదో తరగతి చదువుతున్న విద్యార్థినిపై ఓ వ్యక్తి దాడికి పాల్పడటంతో పాటు, ఆమెను రక్షించేందుకు అడ్డుగా వచ్చిన మరో విద్యార్థిపై కూడా దాడి చేయడాన్ని దివ్యాంగ ఉద్యోగ సంఘం, సక్షం, బాలల హక్కుల పరిరక్షణ వేదిక, లయన్స్ క్లబ్, ఎస్.జి.టి.ఎఫ్. సంఘాల ప్రతినిధులు తీవ్రంగా ఖండించారు. ఈ ఘటన విద్యార్థుల భద్రతపై ఆందోళన కలిగిస్తోందని లయన్ డా. ఎం.కె. మిశ్రో పేర్కొన్నారు. విద్యాసంస్థల్లోకి చొరబడి విద్యార్థులపై దాడులకు పాల్పడే వారిపై కఠిన చర్యలు తీసుకోవాలని, భవిష్యత్తులో ఇలాంటి ఘటనలు పునరావృతం కాకుండా నిందితుడికి చట్టప్రకారం కఠిన శిక్ష విధించాలని ఆయన డిమాండ్ చేశారు. పాఠశాలల్లో భద్రతా వ్యవస్థను మరింత బలోపేతం చేసి విద్యార్థులు, విద్యార్థినులు, ఉపాధ్యాయులు, ఉపాధ్యాయేతర సిబ్బందికి పూర్తి రక్షణ కల్పించేలా తగిన చర్యలు చేపట్టాలని ముఖ్యమంత్రి నారా చంద్రబాబు నాయుడు, ఉపముఖ్యమంత్రి  పవన్ కళ్యాణ్, విద్యాశాఖ మంత్రి నారా లోకేష్‌లను కోరారు. విద్యార్థుల భద్రతకు ప్రభుత్వం అత్యంత ప్రాధాన్యం ఇచ్చి, ఇలాంటి ఘటనలు మరోసారి జరగకుండా పటిష్ఠమైన చర్యలు తీసుకోవాలని ఆయన విజ్ఞప్తి చేశారు.