శేరిలింగంపల్లిలో మేధావుల సదస్సు దేశ భద్రత, ఆర్థిక పారదర్శకతే కేంద్రం ప్రాధాన్యం: ఎంపీ కొండా విశ్వేశ్వర్‌రెడ్డి
గచ్చిబౌలి,మేజర్ న్యూస్ : కాంగ్రెస్‌ పార్టీ ఎస్‌ఐఆర్‌ (SIR), ఎఫ్‌సీఆర్‌ఏ (FCRA) నిబంధనలపై చేస్తున్న తప్పుడు ప్రచారాన్ని వాస్తవాలతో తిప్పికొట్టేందుకు శేరిలింగంపల్లి నియోజకవర్గం కొండాపూర్‌లోని సీసీఆర్‌టీ ప్రాంగణంలో మేధావుల సదస్సు నిర్వహించారు. చేవెళ్ల ఎంపీ డాక్టర్‌ కొండా విశ్వేశ్వర్‌రెడ్డి, బీజేపీ రాష్ట్ర అధికార ప్రతినిధి రవికుమార్‌ యాదవ్‌ పాల్గొన్నారు.ఈ సందర్భంగా ఎంపీ మాట్లాడుతూ.. దేశ భద్రత, ఆర్థిక పారదర్శకత, సార్వభౌమాధికార పరిరక్షణే ప్రధాని మోదీ ప్రభుత్వ ప్రాధాన్యాలని పేర్కొన్నారు. ఎఫ్‌సీఆర్‌ఏ నిబంధనల ద్వారా విదేశీ నిధుల వినియోగంపై నియంత్రణ ఉంటుందని, నిబంధనలు ఉల్లంఘించిన వారిపై చర్యలు తీసుకుంటే కాంగ్రెస్‌ రాజకీయం చేయడం సరికాదన్నారు.రవికుమార్‌ యాదవ్‌ మాట్లాడుతూ.. జాతీయ భద్రత, దేశ సమగ్రతను కాపాడేందుకే కేంద్రం సంస్కరణలు చేపడుతోందన్నారు. మేధావులు వాస్తవాలను ప్రజల్లోకి తీసుకెళ్లాలని పిలుపునిచ్చారు. అనంతరం ఐటీ నిపుణులు, న్యాయవాదులు, పరిశోధకులు, విశ్రాంత అధికారులు అడిగిన ప్రశ్నలకు నేతలు సమాధానాలిచ్చారు. కార్యక్రమంలో బీజేపీ నాయకులు, వివిధ రంగాల ప్రముఖులు పాల్గొన్నారు.
