అమిత్ షా పాదయాత్రకు భారీగా తరలివెళ్లిన శేరిలింగంపల్లి బీజేపీ శ్రేణులు
రవికుమార్ యాదవ్ ఆధ్వర్యంలో భారీగా పాల్గొన్న నాయకులు, కార్యకర్తలు
గచ్చిబౌలి,మేజర్ న్యూస్ : తెలంగాణ రాష్ట్ర బీజేపీ ఆధ్వర్యంలో నిర్వహించిన “ప్రజాస్వామ్యాన్ని పరిరక్షిద్దాం – అరాచకవాదాన్ని అంతం చేద్దాం” పాదయాత్రలో కేంద్ర హోంశాఖ మంత్రి అమిత్ షా పాల్గొన్నారు. నిజాం కాలేజీ ఎదురుగా ఉన్న భారతరత్న డాక్టర్ బాబు జగ్జీవన్ రామ్ విగ్రహం నుంచి మొజంజాహి మార్కెట్ వరకు సాగిన ఈ పాదయాత్రకు శేరిలింగంపల్లి నుంచి బీజేపీ శ్రేణులు భారీగా తరలివచ్చారు.బీజేపీ రాష్ట్ర అధికార ప్రతినిధి, శేరిలింగంపల్లి అసెంబ్లీ ఇంచార్జి రవికుమార్ యాదవ్ ఆధ్వర్యంలో నాయకులు, కార్యకర్తలు పెద్ద సంఖ్యలో పాల్గొన్నారు. ఈ సందర్భంగా ఆయన మాట్లాడుతూ రాజ్యాంగ సంస్థల గౌరవాన్ని కాపాడటం, ప్రజాస్వామ్య విలువలను పరిరక్షించడం ప్రతి ఒక్కరి బాధ్యతని, ప్రజాస్వామ్య వ్యవస్థలపై ప్రజల్లో విశ్వాసాన్ని బలోపేతం చేయాలని పిలుపునిచ్చారు.ఈ కార్యక్రమంలో బీజేపీ రాష్ట్ర, జిల్లా, నియోజకవర్గ నాయకులు, ప్రజాప్రతినిధులు, వివిధ మోర్చాల నాయకులు, కార్యకర్తలు పాల్గొన్నారు.
