గండిపేట కాండ్యూట్‌పై చురుగ్గా మరమ్మతు పనులు : జలమండలి ఎండీ అశోక్ రెడ్డి
హైదరాబాద్ మేజర్ న్యూస్ (సిటీ ప్రతినిధి):హైదరాబాద్ నగరానికి గండిపేట (ఉస్మాన్‌సాగర్) నుంచి తాగునీటిని సరఫరా చేసే వందేళ్లకు పైగా పురాతనమైన రాతి నిర్మాణ కాండ్యూట్‌పై లీకేజీల మరమ్మతు పనులు చురుగ్గా కొనసాగుతున్నాయి. సబ్జా కాలనీ, టోలిచౌకి, మణికొండ ప్రాంతాల్లో ఏర్పడిన లీకేజీలను అరికట్టేందుకు జలమండలి నవంబర్ 3వ తేదీ మంగళవారం ఉదయం 6 గంటల నుంచి 4వ తేదీ బుధవారం సాయంత్రం 6 గంటల వరకు 36 గంటల పాటు షట్‌డౌన్ ప్రకటించిన విషయం తెలిసిందే.
ఈ నేపథ్యంలో 20 ఎంజీడీల సామర్థ్యం గల కాండ్యూట్‌పై మరమ్మతు పనులను అధికారులు వేగవంతం చేశారు. నిర్ణీత గడువు కంటే ముందుగానే పనులు పూర్తి చేసి, ప్రభావిత ప్రాంతాలకు తాగునీటి సరఫరాను పునరుద్ధరించేందుకు చర్యలు చేపడుతున్నారు.
ఈ సందర్భంగా జలమండలి ఎండీ శ్రీ కె. అశోక్ రెడ్డి అధికారులకు పలు సూచనలు చేశారు. వందేళ్లకు పైగా పురాతనమైన కాండ్యూట్ కావడంతో మరమ్మతుల విషయంలో ప్రత్యేక జాగ్రత్తలు తీసుకోవాలని ఆదేశించారు. భవిష్యత్తులో ఇలాంటి లీకేజీలు పునరావృతం కాకుండా నాణ్యతా ప్రమాణాలు పాటిస్తూ శాశ్వత పరిష్కారానికి ప్రాధాన్యం ఇవ్వాలని స్పష్టం చేశారు.
మరమ్మతుల కారణంగా తాగునీటి సరఫరా నిలిచిపోయిన ప్రాంతాల్లో ప్రజలకు ఇబ్బందులు కలగకుండా అవసరమైన మేరకు ట్యాంకర్ల ద్వారా నీటిని అందించేందుకు ఏర్పాట్లు చేయాలని సూచించారు. ముఖ్యంగా ట్రాన్స్‌మిషన్, ఆపరేషన్ అండ్ మెయింటెనెన్స్ విభాగాల అధికారులు పరస్పర సమన్వయంతో పనిచేస్తూ నీటి సరఫరా పరిస్థితిని నిరంతరం పర్యవేక్షించాలని ఆదేశించారు.
నగరానికి వివిధ జలవనరుల నుంచి ప్రతిరోజూ దాదాపు 560 ఎంజీడీల తాగునీరు సరఫరా అవుతుండగా, ప్రస్తుత షట్‌డౌన్ కేవలం గండిపేటకు సంబంధించిన 20 ఎంజీడీల కాండ్యూట్‌కు మాత్రమే పరిమితమని జలమండలి స్పష్టం చేసింది. కృష్ణా, గోదావరి, సింగూరు–మంజీరా తదితర ఇతర జలవనరుల నుంచి నీటి సరఫరా యథావిధిగా కొనసాగుతుందని తెలిపింది.
మరమ్మతు పనులను వీలైనంత త్వరగా పూర్తి చేసి, ప్రభావిత ప్రాంతాల్లో నీటి సరఫరాను పునరుద్ధరించేందుకు అన్ని చర్యలు తీసుకుంటున్నట్లు జలమండలి వెల్లడించింది. అప్పటివరకు వినియోగదారులు అందుబాటులో ఉన్న నీటిని పొదుపుగా వినియోగించుకోవాలని విజ్ఞప్తి చేసింది.
