గోపీనగర్ లో వెలగని వీధిదీపాలు.... పట్టించుకోని అధికారులు.
గచ్చిబౌలి,మేజర్ న్యూస్ : గోపీనగర్ బీసీ హాస్టల్‌ సమీపంలో వీధి దీపాలు వెలగకపోవడంతో స్థానికులు తీవ్ర ఇబ్బందులు ఎదుర్కొంటున్నారు. రాత్రి వేళల్లో ప్రాంతమంతా చీకటిమయంగా మారుతోంది. ఇదే అదనుగా కొందరు యువకులు సమీపంలోని చెట్లు, రాళ్ల ప్రాంతాల్లో గంజాయి సేవించడం, సిగరెట్లు తాగడం, మద్యం సేవించడం వంటి అసాంఘిక కార్యకలాపాలకు పాల్పడుతున్నారని స్థానికులు ఆరోపిస్తున్నారు.ఈ ప్రాంతంలో మహిళలు, చిన్నపిల్లలు నిత్యం రాకపోకలు సాగిస్తుంటారని, చీకటి కారణంగా వారి భద్రత పై ఆందోళన నెలకొందని చెబుతున్నారు. రాత్రి వేళల్లో ఏదైనా అవాంఛనీయ ఘటన జరిగితే బాధ్యత ఎవరిదని అధికారులను ప్రశ్నిస్తున్నారు. ప్రజల భద్రతను దృష్టిలో ఉంచుకుని సంబంధిత అధికారులు వెంటనే స్పందించాలని కోరుతున్నారు.గోపీనగర్ బీసీ హాస్టల్‌ పరిసరాల్లో వెంటనే వీధి దీపాలను పునరుద్ధరించాలని, రాత్రి వేళల్లో పోలీసుల గస్తీ పెంచాలని స్థానికులు డిమాండ్‌ చేస్తున్నారు.
