రహదారిపై ఆక్రమణలు తొలగించి ప్రజలకు న్యాయం చేయాలి.....

                                మసీదుబండలో రహదారులు, కాలువల ఆక్రమణలపై అధికారులకు  ఫిర్యాదు
కొండాపూర్,మేజర్ న్యూస్ :  మసీదుబండ  పరిధిలోని సర్వే నంబర్‌ 169లో జరుగుతున్న నిర్మాణ పనులు, రహదారి ఆక్రమణలపై అధికారులు తక్షణమే స్పందించి చర్యలు తీసుకోవాలని మసీదుబండ ప్రజలు కోరారు. ఈ మేరకు సీఎంసీ,శేరిలింగంపల్లి జోనల్ కార్యాలయం,టౌన్ ప్లానింగ్ కార్యాలయంలో సంబంధిత అధికారులకు సోమవారం ప్రజావాణిలో  పిర్యాదు చేశారు.ఈ సందర్బంగా హెచ్‌సీయూ బస్‌ డిపో నుంచి మసీదుబండ బొటానికల్‌ గార్డెన్‌ వరకు ఉన్న 100 అడుగుల రహదారి పరిధిలో నిబంధనలకు విరుద్ధంగా నిర్మాణాలు చేపడుతున్నారని మసీదుబండ ప్రజలు ఆరోపించారు. 

మూడు సెల్లార్లతో కూడిన బహుళ అంతస్తుల భవన నిర్మాణంతో పాటు రహదారికి సంబంధించిన స్థలాన్ని ఆక్రమించే విధంగా ఇనుప రేకులతో కంచెలు, షెడ్లు ఏర్పాటు చేసినట్లు తెలిపారు.అలాగే ప్రభుత్వ నిధులతో జీహెచ్‌ఎంసీ ఆధ్వర్యంలో నిర్మించిన 4.5 అడుగుల వెడల్పు కాలువలు, 100 అడుగుల రహదారి స్థలాన్ని ఆక్రమించకుండా చర్యలు తీసుకోవాలని కోరారు. 120 అడుగుల రహదారికి సంబంధించిన సెట్‌బ్యాక్‌ నిబంధనలు కూడా అమలయ్యేలా చూడాలని విజ్ఞప్తి చేశారు.బిల్డర్‌కు మంజూరైన అనుమతులు, నిర్మాణ ప్రణాళికలను క్షేత్రస్థాయిలో పరిశీలించి, నిబంధనలకు విరుద్ధంగా ఏర్పాటు చేసిన ఇనుప కంచెలు, షెడ్లు, ఇతర ఆక్రమణలను తొలగించాలని వారు డిమాండ్‌ చేశారు.

 ప్రభుత్వ రహదారులు, కాలువలు ప్రజల ప్రయోజనాల కోసమేనని, వాటిని వ్యక్తిగత అవసరాలకు వినియోగించకుండా అధికారులు కఠిన చర్యలు తీసుకోవాలని కోరారు.ప్రజలకు ఇబ్బందులు కలగకుండా రహదారిని పూర్తిస్థాయిలో అందుబాటులోకి తీసుకురావాలని, అక్రమ నిర్మాణాలపై సమగ్ర విచారణ జరిపి బాధ్యులపై చర్యలు తీసుకోవాలని మసీదుబండ ప్రజలు అధికారులకు  విజ్ఞప్తి చేశారు.స్పందించిన అధికారులు వెంటనే సంఘటన స్థలాన్ని సందర్శించి రహదారి, కాలువల ఆక్రమణలను పరిశీలించిన  నిబంధనలకు విరుద్ధంగా చేపట్టిన నిర్మాణాలను తొలగించాలని సంబంధిత బిల్డర్ ను హెచ్చరించారు.