లక్ష్మీపతిగూడెంలో సత్యసాయి పల్లకి సేవ కార్యక్రమం

జిన్నారం;గడ్డపోతారం మున్సిపాలిటీ పరిధిలోని 17వ వార్డు లక్ష్మీపతిగూడెంలో హనుమాన్ ఆలయ కమిటీ ఆధ్వర్యంలో సత్యసాయి సేవా సంస్థ ప్రతినిధుల సహకారంతో సత్యసాయి పల్లకీ సేవ, మాతృమూర్తుల పాదపూజ కార్యక్రమాలను ఆదివారం భక్తిశ్రద్ధలతో నిర్వహించారు. ఈ సందర్భంగా సత్యసాయి పల్లకీ సేవను భక్తులు అత్యంత భక్తిప్రపత్తులతో నిర్వహించారు. అనంతరం మాతృమూర్తులను గౌరవిస్తూ వారి పాదాలకు పూజలు నిర్వహించారు. మాతృమూర్తులను గౌరవించడం, సేవాభావాన్ని పెంపొందించడం, ఆధ్యాత్మిక విలువలను ప్రతి ఒక్కరిలో చాటిచెప్పడమే ఇలాంటి కార్యక్రమాల ముఖ్య ఉద్దేశమని నిర్వాహకులు తెలిపారు. పల్లకీ సేవ, పాదపూజ కార్యక్రమాలతో గ్రామంలో ఆధ్యాత్మిక వాతావరణం వెల్లివిరిసింది. ఈ కార్యక్రమంలో స్థానిక కౌన్సిలర్ కుమ్మరి కృష్ణ, హనుమాన్ ఆలయ కమిటీ సభ్యులు, సత్యసాయి సేవా సంస్థ ప్రతినిధులు, మహిళలు, భక్తులు, గ్రామస్తులు పెద్ద సంఖ్యలో పాల్గొన్నారు.