వైఎస్ఆర్ కాంగ్రెస్ ను వీడి తెదేపా లోకి వలసలు

రాజాం, సూర్య : స్థానిక ఎన్నికల వేళ రాజాం నియోజక వర్గంలో వైసీపీలో కలవరం మొదలయ్యింది.గ్రామస్థాయిలో పట్టున్న నాయకులు,క్రియాశీలక కార్యకర్తలు ఒక్కొక్కరుగా వైకాపాను వీడుతుండటం రాజకీయంగా ప్రాధాన్యత సంతరించుకుంటోంది. రాజాం మండలం శ్యాంపురం తెదేపా క్యాంప్ కార్యాలయంలో రాజాం మండలం గడ్డిముడిదాం పంచాయతీ,పీఎస్ఆర్ పురం గ్రామానికి చెందిన 30 కుటుంబాలు,రేగిడి మండలం లచ్చరాయపురం (కుమ్మరి అగ్రహారం)కు చెందిన 50 కుటుంబాలు తెలుగుదేశం పార్టీలో చేరారు. వీరిని సాదరంగా ఆహ్వానించి పార్టీ కండువాలు ఎమ్మెల్యే కోండ్రు మురళీమోహన్ వేశారు.ఈ సందర్భంగా ఎమ్మెల్యే  మాట్లాడుతూ స్థానిక ఎన్నికల విజయంలో ప్రతీ ఒక్కరూ భాగస్వామ్యం కావాలని పిలుపునిచ్చారు.కూటమి పాలనలో పల్లెలకు మహర్దశ పట్టిందని,ప్రగతి బాటలో గ్రామాలు సస్యశ్యామలంగా ఉన్నాయని అయన  అన్నారు.రాజాం నియోజకవర్గంలో రెండేళ్లలో గ్రామాల రూపురేఖలు పూర్తిగా మార్చమన్నారు. గ్రామీణ ప్రాంతాల మౌలిక సదుపాయాల కల్పనకు అత్యంత ప్రాధాన్యం కల్పిస్తున్నామన్నారు. సీసీ,బీటీ రహదారుల నిర్మాణం, తాగునీటి సౌకర్యాలు, పారిశుద్ధ్యం, వీధి దీపాలు, డ్రైనేజీ వ్యవస్థలను మెరుగుపరచి,పల్లెల్లో అభివృద్ధికి కృషిచేసినట్లు పేర్కొన్నారు.