ప్రజా సమస్యల పరిష్కారమే ప్రథమ ప్రాధాన్యం

హిరమండలం, సూర్య : ప్రజలకు అందుబాటులో ఉంటూ వారి సమస్యల పరిష్కారానికి, మండల అభివృద్ధికి నిరంతరం కృషి చేస్తానని హిరమండలం బీజేపీ జెడ్పీటీసీ అభ్యర్థి త్రివేణి తెలిపారు. శుక్రవారం స్థానిక విలేకరులతో ఆమె మాట్లాడుతూ, తనకు అవకాశం కల్పిస్తే హిరమండలం మండలంలోని గ్రామాల్లో నెలకొన్న సమస్యలను గుర్తించి, వాటి పరిష్కారానికి కృషి చేస్తానన్నారు. ప్రజలు ఎదుర్కొంటున్న ఇబ్బందులను సంబంధిత అధికారుల దృష్టికి తీసుకెళ్లి పరిష్కారమయ్యేలా చర్యలు చేపడతానని పేర్కొన్నారు. కేంద్ర, రాష్ట్ర ప్రభుత్వాల నిధులతో మండలంలో అభివృద్ధి పనులు చేపట్టేందుకు కృషి చేయడంతో పాటు, ప్రజలకు మెరుగైన మౌలిక సదుపాయాలు కల్పించడమే తన లక్ష్యమని స్పష్టం చేశారు. ప్రధాని నరేంద్ర మోదీ సుపరిపాలన, సంక్షేమ పథకాలు, కూటమి ప్రభుత్వం చేపడుతున్న అభివృద్ధి కార్యక్రమాలను ప్రజల్లోకి తీసుకెళ్లి, వాటి ప్రయోజనాలను వివరించనున్నట్లు తెలిపారు. ఈ కార్యక్రమంలో బీజేపీ జిల్లా అధ్యక్షుడు సిరిపురం తేజేశ్వరరావు, కూటమి పార్టీల నాయకులు, కార్యకర్తలు పాల్గొన్నారు.