షాబాద్‌లో రూ.2 లక్షల విలువైన డ్రగ్స్ పట్టివేత.. ఇద్దరు అరెస్ట్
షాబాద్‌లో మాదకద్రవ్యాల అక్రమ రవాణాపై పోలీసులు చర్యలు చేపట్టారు. షాబాద్ పోలీసులు, చేవెళ్ల జోన్ ఎస్‌ఓటీ బృందం సంయుక్తంగా నిర్వహించిన తనిఖీల్లో 13.97 గ్రాముల ఎండీఎంఏ డ్రగ్స్‌ను స్వాధీనం చేసుకుని ఇద్దరిని అరెస్ట్ చేశారు. పట్టుబడిన డ్రగ్స్ విలువ సుమారు రూ.2 లక్షలు ఉంటుందని పోలీసులు అంచనా వేశారు. అక్టోబర్ 9న అందిన విశ్వసనీయ సమాచారం మేరకు నాగర్‌కుంట చౌరస్తా సమీపంలోని టీ-టైమ్ వద్ద పోలీసులు తనిఖీలు నిర్వహించి మారమ్ వంశీ రెడ్డి (23), బీరా ప్రవీణ్ కుమార్ (28)లను అదుపులోకి తీసుకున్నారు. వీరిద్దరూ మీర్జాగూడలోని ఇంద్రారెడ్డి నగర్ కాలనీకి చెందినవారిగా గుర్తించారు. వారి వద్ద నుంచి డ్రగ్స్‌తో పాటు రెండు రెడ్‌మి మొబైల్ ఫోన్లు, ఒక కీప్యాడ్ ఫోన్‌ను స్వాధీనం చేసుకున్నారు. ప్రాథమిక విచారణలో బెంగళూరుకు చెందిన స్టీఫెన్ వద్ద గ్రాముకు రూ.3 వేల చొప్పున సుమారు 14 గ్రాముల ఎండీఎంఏను రూ.42 వేలకు కొనుగోలు చేసినట్లు నిందితులు వెల్లడించారని పోలీసులు తెలిపారు. మోకిల, కోకాపేట, నానక్‌రామ్‌గూడ ప్రాంతాల్లో విద్యార్థులు, సాఫ్ట్‌వేర్ ఉద్యోగులకు విక్రయించేందుకు డ్రగ్స్ తీసుకొస్తున్నట్లు విచారణలో వెల్లడైందన్నారు. పరారీలో ఉన్న స్టీఫెన్ కోసం గాలింపు చేపట్టారు. ఈ ఘటనపై ఎన్‌డీపీఎస్ చట్టం-1985లోని సెక్షన్ 8(సి) రెడ్‌విత్ 22(సి) కింద కేసు నమోదు చేసి తదుపరి దర్యాప్తు కొనసాగిస్తున్నారు. మాదకద్రవ్యాల అక్రమ విక్రయాల గురించి సమాచారం తెలిస్తే పోలీసులకు తెలియజేయాలని, సమాచారదారుల వివరాలను గోప్యంగా ఉంచుతామని అధికారులు కోరారు.
షాబాద్, మేజర్ న్యూస్ (అక్టోబర్ 10)
