లాభాల వాటా తేల్చాల్సిందే - సీఐటీయూ బ్రాంచ్  కార్యదర్శి కస్తూరి చంద్రశేఖర్

సూర్య నస్పూర్ : సింగరేణి 2025–26 ఆర్థిక సంవత్సరానికి సంబంధించిన లాభాల వాటాను ఎప్పుడు ప్రకటిస్తారని సింగరేణి కాంట్రాక్ట్‌ ఎంప్లాయీస్‌ యూనియన్‌ సీఐటీయూ బ్రాంచ్‌ కార్యదర్శి కస్తూరి చంద్రశేఖర్‌ ప్రశ్నించారు. లాభాల వాటాను ప్రకటించి కార్మికుల వాటాను వెంటనే వెల్లడించాలని డిమాండ్‌ చేశారు. బుధవారం ఆర్కే న్యూటెక్‌ గని వద్ద సీఐటీయూ ఆధ్వర్యంలో ప్లకార్డులతో నిరసన చేపట్టారు. ఫిట్‌ సెక్రటరీ పెరుక సదానందం అధ్యక్షతన జరిగిన ఈ కార్యక్రమంలో కస్తూరి చంద్రశేఖర్‌ మాట్లాడుతూ, రెండు, మూడు నెలలుగా డ్రిల్‌ బిట్లు, రాడ్లు, నాలుగు, ఐదు నెలలుగా బూట్లు, సాక్సులు ఇవ్వడం లేదన్నారు. వెంటనే వాటిని అందించాలని కోరారు. సర్ఫేస్‌/ఫిట్‌ ఫర్‌ సేమ్‌ జాబ్‌ పొందిన వారికి మరోసారి మెడికల్‌ బోర్డు అవకాశం కల్పించేలా సర్క్యులర్‌ను సవరించాలని, 150 మస్టార్ల క్రమశిక్షణ చర్యల సర్క్యులర్‌ను మార్చాలని డిమాండ్‌ చేశారు. క్లరికల్‌ సిబ్బందికి ఫర్నిచర్‌, కంప్యూటర్లు, ప్రింటర్లు, కార్మికులకు కొత్త యూనిఫాంలు అందించాలని కోరారు. 12 ఏళ్లుగా భర్తీ చేయని సెక్యూరిటీ సిబ్బంది పోస్టులను యువ కార్మికులు, కార్మికురాళ్లతో భర్తీ చేయాలని డిమాండ్‌ చేశారు. లాభాల వాటాపై ఐఎన్‌టీయూసీ ఎందుకు స్పందించడం లేదని ప్రశ్నించారు.